Сактыышкынның болгаш кажыыдалдың хүнүнде шериг полициязының ажылдакчылары Ада-чурт дайынының хоочуну Кирил Марков-биле ужуражылганы эрттирген. Аңаа уругларның Юнармия хөй-ниити организациязының элээди оолдары база киришкен.
Аныяк-өскенге эрткен үеже хая көрнүп, чуртунуң төөгүзүн өөрениринге таарымчалыг байдалдарны тургузуп, улуг болгаш аныяк салгал аразынга харылзааны быжыглаары ук хемчегниң кол сорулгазы дээрзин шериг полициязының майору Шамиль Асадулаев дыңнаткан.
Кирилл Марков – Ада-чурттуң Улуг дайынының хоочуну. Ол 1930 чылдың июль 28-те Тюмень облазының Рассвет суурунга төрүттүнген.
1941 чылда дайын эгелей бээрге, колхозка 11 харлыындан эгелеп ажылдай берген. Ооң чугаалап турары-биле, сиген кезеринге, далган-тараа тарыырынга, ногаа олуртурунга элээди оолдар, уруглар идепкейлиг киржип турган. 1951 чылдың март айда ССРЭ-ниң шериинче адыгжы кылдыр кыйгырткан. Кызыл Шериг-биле кады Прибалтика чурттарынга национал дээрбечи чорукту узуткаарынга үлүг-хуузун кииргени дээш янзы-бүрү орден-медаль-биле шаңнаткан. Ол ышкаш көдээ ажыл-агый шугумунга хөй чылдарда ак сеткилдиг ажылы дээш “Күш-ажылдың тергиини” деп хөрек демдээ-биле база ССРЭ-ниң Улустуң көдээ ажыл-агыйының чедиишкиннериниң делгелгезиниң мөңгүн медалы-биле шаңнаткан.
«Мурнуку одуругларда тулчуп турар дайынчы оолдарывыска командирлериниң чугаазын дыңнаарын, бот-боттарынга хумагалыг болурун база тиилелгелиг ээп чанып келирин күзеп тур мен. Шериг чурумун шыңгыы сагыыр болза, тиилелге черле бистии болур» — деп, Ада-чурттуң Улуг дайынының хоочуну Кирилл Марков чугаалап турар.
Шериг полициязы Тиилелге шөлүнге фашистерге удур демисешкен Ада-чурттуң Улуг дайынынга амы-тынындан чарылган маадырларның чырык адын мөңгежидери-биле боодал чечектер өргүүр ёзулалга болгаш Сактыышкын чулазынга идепкейлиг киришкенин сагындыраал. Кажыыдал минутазы, боодал чечектер өргүүр ёзулалга ук албан чериниң ажылдакчылары Ада-чурт дайынының хоочуну Кирилл Марковка Тиилелгениң сүлдези — Мөңге от чанынга боодал чечектер өргүүрүнге дузалашкан.
Алиса ДОНГАК.
Буян ООРЖАКТЫҢ тырттырган чуруктары.
"Шын" №46 2023 чылдың июнь 24
