Ада-чурттуң Улуг дайынының үезинде Сталинград дээш тулчуушкунга совет шериглерниң тиилелгезиниң 82 чылынга тураскааткан “Танцыда тураскаал. Душ болган вальс” деп акцияны Кызыл хоорайның Тиилелге шөлүнге чылдың-на эрттирери чаңчыл апарган. Бо чылын ол акция февраль 3-те болуп эрткен. Ону Улусчу фронт шимчээшкинни организастап эрттирген.
“Душ болган вальстың” аайы-биле Баштайгыларның шимчээшкининиң киржикчилери, элээди армейжилер, Тываның күрүне университединиң Шериг-өөредилге төвүнүң курсантылары, студент отрядтарның кежигүннери болгаш Улусчу фронтунуң Аныяктар чалгыны шимчээшкинниң төлээлери вальстап танцылааннар.
“Сталинград дээш тулчуушкунга совет шериглерниң тиилелгезиниң 82 чылынга тураскааткан Бүгү-российжи “Танцыда тураскаал. Душ болган вальс” акцияны Улусчу фронтунуң аныяктары чылдың-на эрттирип келген. Ындыг акцияларны эрттирип турары, аңаа аныяктарның идепкейлиг киржилгези маадырлыг төөгүлүг чоруктарны утпазынга, оларның дугайында сактыышкыннарны аныяктарга дамчыдып бээринге, маадырлыг өгбелеривиске хүндүткелди болгаш аныяктарга патриотчу мөзү-шынарны кижизидеринге дузалыг дээрзинге бүзүрээр бис” – деп, Улусчу фронтунуң Аныяктар чалгыны шимчээшкинниң регионда башкарыкчызы Дариймаа Ховалыг чугаалаан.
“Танцыда тураскаал. Душ болган вальс” деп акцияны Россияның шупту регионнарында эрттирип турар. Аңаа киржиринге кандыг-даа шаптараазын чок. Вальстап танцылап билбес кижилерни өөредип каар.
“Душ болган вальс” – ол ынакшылдың анаа-ла төөгүзү эвес. Ол танцыга тураскаал-дыр. Российжи солдаттарның тура-соруунуң күштүүнүң болгаш тиилелгеге бүзүрелиниң херечизи-дир. Ол дээрге Төрээн чуртка ынакшыл болгаш Тиилелге кандыг чидириглерниң үнези-биле чедип алдынган дугайында төөгү-дүр.
Фронтуга аныяк дайынчылар оолдар болгаш уруглар “Душ болган вальстың” аялгазы-биле бөөлденип танцылап чорааннар. Вальс оларга дайылдажырынга күштү болгаш тиилелгеге бүзүрелди берип турган.
Мындыг янзылыг патриотчу акцияларны Тывага моон-даа соңгаар эрттирерин, аңаа хөй кижилерни хаара тударын планнаан.
“Душ болган вальстың” төөгүзү мындыг. Композитор Евгений Долматовский биле композитор Марк Фрадкин фронт чоогунда суурга аныяк солдаттар биле уруглар вальс танцылап турарын көрүп турганнар. Чааскаанзыргай турган уруг Зинаны аныяк ужудукчу Василий вальсче чалаан. Ынчалза-даа олар үр вальставааннар. Ужудукчуну дайынчы даалгаже кыйгырты берген. Композитор Евгений Долматовский биле композитор Марк Фрадкин аныяктар эки таныжып ап четтикпээнинге хомудааш, “Душ болган вальсты” бижип кааннар. Радиога бо ырыны дыңнааш, Зина ужудукчу оолдуң адрезин тып бээрин дилээн. Михаил Фрадкин ужудукчунуң адрезин үр дилээш, ону Зинага айтып бээр аргазы чок болган. Чүге дээрге Василий агаар тулчуушкуннарының бирээзинге амы-тынындан маадырлыы-биле чарылган.
Бистиң корр.
Буян ООРЖАКТЫҢ тырттырган чуруктары.
«Шын» №4 2025 чылдың февраль 6
