Оглум Александр Мунзукович Чооду Эрзин кожууннуң Качык школазынга күш-культура башкылап ажылдап турган. Школазының коллективи, директору Чырандаевна оглумнуң ажылдаарын аажок мактаарлар.
Оглум 38 харлап тургаш, тускай шериг операциязынче эки турачылап, бодунуң күзели-биле кымга-даа чугаалавайн чорупкан болду. Сөөлгү катап дайын шөлүнче чоруур бетинде эштерин дамчыштыр телефонга авазынга, меңээ, ырлап берген. Оглум дыка ырлаар, чогаадыкчы салым-чаяанныг кижи-ле болгай.
Ол ам бо хүнге чедир ис чок читкен. Кады төрээн дуңмалары Алёна, Айдыңмаа Ростов-на-Донуже ийи катап акызын дилеп чорааш, түңнел чок келгеннер. Оглумнуң кады чурттаан эжи, кеннивис Байлак, Красноярскыда эмчи черинде өөренип турар, уруу Айысмаа база-ла манаашкында.
Кырган ие кижиге, меңээ, оглумнуң дүрген-не тыптып кээрин манап, уйгу-чыдын чок, хөй чүве бодап, манаашкынга олурары дыка-ла берге-дир. Сагыш-сеткилге чүү-даа кирер. Оглумнуң дөргүл-төрели, эш-өөрү, башкылары деткип кээр-дир. Кижиниң чону кончуг.
Күжүр оглум, аваңга-даа дыңнатпайн, дайынче чүге чордуң? Ойнап өскен Мөрен сууруңга, школачы эш-өөрүң-биле ойнап-хөглеп чорууруң кай, оглум.
Эрес-дидим тыва оолдарывыс чуртунче тиилелгелиг ээп чанып-ла кээр болзун, өршээ! Бис аңаа бүзүрээр ужурлуг бис.
Чечекмаа САДИ, ТР-ниң алдарлыг ажылдакчызы.
Эрзин кожуун, Мөрен суур.
“Шын” №99 2024 чылдың декабрь 25