Апрель 29-та Кызылга бир дугаар «Тиилелге балы» деп Бүгү-российжи культурлуг-патриотчу хемчегниң регионалдыг чадазы эрткен. Тиилелгениң 80 чылынга тураскааткан чараш мөөрейниң регионалдыг түңнел чадазынга 12 ортумак профессионал өөредилге черлериниң сургуулдары киришкен. Ниитизи-биле 140 самчы адааннашкан. Команда бүрүзүнге 12 кижи – 6 оол, 6 кыс. Олар үш танцыны албан күүседир: “ Вальс” , “Москваның кадрили”, “Дээң-дээң”.
Шериг хептерлиг болгаш каас-коя платьелерлиг самчылар балга үр үе дургузунда белеткенип келгеннер.
“Бо онзагай мөөрейниң шимчээшкин бүрүзү, өгбелеривистиң эрес-дидим чоруунга мөгейиг деп санап тур мен. Тыва улустуң ус-шеверлериниң техникумун төлээлеп чедип келдим. Үш неделя дургузунда белеткенген бис. Балдың киржикчилери адааннажыр хамаанчок, бот-боттарывысты деткижип турдувус” – деп, “Тиилелге балының” киржикчизи Вячеслав Күжүгет чугаалаан.
Арга-дуржулгалыг балет тургузукчулары болгаш республиканың ат-сураглыг артистери жюрини төлээлеп келгеннер.
“Сургуулдар кызып белеткенген-дир. Бо күүседип турар танцыларны шиңгээдири белен эвес. Ындыг-даа болза, салдынган сорулганы боттандырып шыдапканнар. Танцы дээрге чүгле чараш, ээлгир шимчээшкиннер эвес, сагыш-сеткилин актёрлар дег сценага илередип билири база. Команда бүрүзүнүң костюмнары бот-тускайлаң, өскелерден бүрүнү-биле ылгалып турар-дыр” – деп, жюри даргазы Кызыл Куулар демдеглээн.
Тиилелгениң балы дээрге чүгле байырлал эвес, а аныяктарның патриотчу хөөнүн көдүреринге, өгбелери дээш чоргааралынга чугула базым болган.
Гран-прини болгаш июнь 29-та Москвага Россияның армейжи театрынга болур балга Тываны төлээлеп киржир эргени Чадаана хоорайда Тываның технологтуг колледжизиниң сургуулдары чаалап алганнар.
Бистиң корр.
Чуруктарны Өөредилге яамызындан алган.
«Шын» №16 2025 чылдың май 1