Дүүн, апрель 27-де, Тыва “Тиилелгениң диктантызы” деп делегей акциязынга каттышкан. Диктантының бижилгезинге киржири-биле хамыкты мурнай келген кижилерниң аразында Тываның Баштыңы Владислав Ховалыг база бар. Ол диктант бижиириниң кол шөлү – республиканың Национал музейинге берген мергежилди күүседири-биле чедип келген.
Ажыл-хемчегниң эгезинде “Чаңгыс демниг Россияның” эрттирип турары делегей акциязының Москвада байырлыг ажыдыышкынының онлайн-дамчыдылгазын бараалгаткан.
Дамчыдылганың үезинде акцияның киржикчилеринге байырлыг сөзүн Россияның төөгү ниитилелиниң даргазы Сергей Нарышкин, «Төөгүлүг сактыышкын» деп партийжи төлевилелдиң координатору Александр Хинштейн, Ада-чурттуң Улуг дайынының хоочуннары, РФ-тиң улустуң артизи Владимир Машков чугаалааннар.
Национал музейге болган хемчегни ажыдып тура, Тываның Баштыңы Владислав Ховалыг акцияның киржикчилеринге байыр чедирип, амгы политиктиг байдалдарда бодунуң төөгүзүн билири база ону хүндүлээри тоң чугула деп айыткан.
Диктантыны бижип эгелээриниң бетинде айтырыгларлыг бланкыны канчаар шын долдурарын, ажылдар күүселдезиниң хуусаазын болгаш өске-даа тургустунуп келир айтырыгларга хамаарыштыр тайылбырны берген.
Организакчыларның медеглээни-биле алырга, Национал музейде шөлге республиканың янзы-бүрү ниитилежилгезиниң төлээлери чыглып келген. Диктантының киржикчилериниң бирээзи — ТР-ниң Дээди Хуралының (парламентизиниң) оралакчы даргазы Виктор Глуховтуң чугаазы-биле алырга, ук диктантының бижилгези чүгле политиктиг структураларның эвес, а бүгү тоомчалыг хамаатыларның идепкейлиг амыдыралчы туружун илередип турар.
«Мындыг диктант, чугаажок-ла, херек. Ол дээрге бистиң төөгүлүг сактыышкынывыс-тыр, Ада-чурттуң Улуг дайында болгаш амгы үениң тускай операциязының үезинде кылган маадырлыг чоруктарны кижилер сактып чорурунга эргежок чугула “ деп, Виктор Глухов демдеглээн.
А. ХЕРТЕК белеткээн.
