Шоодуг
Автобус доктаар черде кижи элээн көвей. Уруглар-даа бар. Оларның хөй кезии тоолай кежи бөрттер кеткилээн. Бир оол «Альпинист» дээр холга тудар приёмнигин ажылдадып алган, сандайда олур. Чалгааранчыг болбазы-биле, ону дыңнай бердим. Приёмникте Тываның дамчыдылгазы болуп турар хире. Агаар медээзин дыңнап четтигиптим:
— Республикага шокар булуттаар. Барыын талакы районнарга агаарның температуразы үжен бештен үжен сес градус чедир соок болур...
«Дыка-ла соогаан-дыр» — деп, бодап турумда, бир кижи: «Экии!» дей-дир. Көрнүп келиримге, эжим оол болду. Бөргү чок. Хол-хаптыг холдары-биле мөрбее кыза берген кулактарын чылыды тудуп тур.
— Бөргүң кайыл?— деп айтырдым.
— Чок — дээш, эжим чугаалай берди: —Күзүн суурувуска дыка чараш тоолай кежи бөрттер саткан, шуптузун уруглар садып аппарган. Мен чай чок болгаш, четпейн бардым. Оон район төвүнде "Эңдерик" дээрге, аңаа келдим. Төнген болган. Кызылда черле бар боор дээш, келдим. Автобустан дүшкеш, кудумчуга көрүп чоруурумга, оолдар, уруглар шупту-ла тоолай кежи бөрттүг боорга, мында черле бар-дыр дээш амырай бердим. Оон хеп садыгларын дөгерезин кезидим. Кайда-даа чок болду. Ам куруг чанарым ол ыйнаан.
— Оон өске бөрт чок чүве бе?
— Улус шупту тоолай кежи бөрттүг ышкажыл, мен чоонган мен — дээш, ол кулаан дүрбүп чорупкан.
Хайыраан кулакты деп иштимде кээргел-биле бодап турдум.
Сергей ШААЛЫ.
Чурукту интернеттен алган.
“Шын” №13 2025 чылдың апрель 10