Кадык камгалалынның эге чадазын чаартыр программа-биле Мөңгүн-Тайганың Тоолайлыг суурунда туттунган чаа фельдшер-акушер пунктузунга чугула херек 16 сан эмчиниң дериг-херекселдерин салган. Ол бүгү дериг-херексел садып алыышкыннардан камнап алган акша-биле садып алдынган дээрзин ТР-ниң кадык камгалал сайыдының оралакчызы Орлан Ондар дыңнаткан.
Ырак-узак суурнуң чурттакчыларының кадыының байдалын шинчилээринге чугула херек инголятор, электрокардиограф, дефибриллятор, спирометр, пульсоксиметр, организмде чигирниң, ханда гемоглобин болгаш холестерин хемчээлин хынаар хемчээкчилер, херел дузазы-биле бактериялар чидирер херексел болгаш өске-даа. Ноябрь айда эмчи херекселдерин стерилизаастаар автоклавты салыры манаттынып турар.
Бо чылдың июльда ажыглалче кирген ФАП-ты эмчиниң чаа дериг-херексели-биле четчелээнинге ук суурнуң чурттакчыларынга өөрүнчүг болбастың аргазы чок. Кожуун төвүнден оранчок ырак, тайга-таскыл черде чурттап турар Тоолайлыгның малчыннары ам кадыының байдалын шинчидерде, боттарының суурунга-ла эмчилеп алыр аргалыг боор.
ТР-ниң Кадык камгалал яамызының медээзи-биле.
