«Транспорт сервизи болгаш төлевилел» күрүнениң унитарлыг бүдүрүлгези-биле кожууннар керээлерни чарып, кожууннарже үнүүшкүннерни кылып, ажылды чорудуп турар. Чурттакчы чон база ук албан чери-биле ажылдаар керээлер чарып ап болур аргалыг.
Чаа регион оператору бо хүннерде Чадаана – Бажың-Алаак оруунда хоорайның бок төгер черин аштап, үстүрүп эгелээн. Чөөн-Хемчик кожууннуң чагырга чери чурттакчы чонга богун орук аксынга төкпезин сагындырып, ажылдакчыларның күш-ажылын үнелеп, арыг-силиг болурунче кыйгырган.
Бок төгеринге көрдүнмээн черлерде бок-сак чыл-чылы-биле овааланып, чыглып, улуг девискээрлерни ээлеп турары чажыт эвес. «Транспорт сервизи болгаш төлевилел» бүдүрүлгези 2022 чылда Чөөн-Хемчик, Каа-Хем, Өвүр, Тес-Хем кожууннарның болгаш Ак-Довурак хоорайның девискээрлерин аштап-арыглаар.
Чаагайжыдылга болгаш санитарлыг арыглаашкын айында республиканың бүгү суурлары болгаш хоорайларында субботниктер неделя санында болуп турар.
Чадаана хоорайда санитарлыг арыглаашкын, чугайлаашкын база будуур ажылдар уламчылавышаан. Субботниктерде ажылчын коллективтер болгаш чурттакчы чон хөй-ниити чыглыр черлерни болгаш бажыңнар чанының участоктарын аштап-арыглаан.
ТМГ Медээлер.