Хереглекчилерниң эрге-ажыктарын камгалаары – күрүнениң хайгаарал болгаш хоойлу-дүрүм камгалалының албан черлериниң кол сорулгазы. Аъш-чем дээш өске-даа барааннарның шынарынга хамаарыштыр хомудалдар садып алыкчыларның талазындан республикада хыналда болгаш хайгаарал органнарынга удаа-дараа кирип турар. Ол хомудал билдириишкиннер ёзугаар Росхереглелхайгаарал албан чериниң ажылдакчылары хыналдаларны чорудар хүлээлгелиг.
Тыва Республиканың Чазааның Аппарадының ээлчеглиг хуралының үезинде Росхереглелхайгааралдың удуртукчузу Людмила Салчактың Тываның Баштыңы Владислав Ховалыгга дыңнатканы-биле алырга, багай шынарлыг барааннарны садып турганы дээш 2024 чылдың эрткен айларында хоойлу-дүрүм болгаш күрүне хайгааралының органнары садыгларны ниитизи-биле 1,6 сая рубль акшага торгаан. Ооң 1,4 саязы хайгаарал органнарының торгаал акшазы.
Хереглекчилерниң эрге-ажыын хажыдып, колдуунда багай шынарлыг таакпы болгаш аъш-чем барааннарын чонга сада бээр таварылгалар илереттинип келген. Багай шынарлыг 4,6 муң таакпы аймаан, сүттен болбаазырадып бүдүрген багай шынарлыг 50 тонна ак чем аймаан садыглардан хайгаарал албан черлериниң ажылдакчылары илереткен. Багай шынарлыг таакпының ниити өртээ 700 муң рубль болган. Марка демдээ чок эжеш 212 идикти база тыпкан.
Багай шынарлыг барааннар садып алганындан акша когаралы, сагыш-сеткилдиң моральдыг чидириглери дээш хереглекчилерге 681,9 муң рубль акшаны эгиткен.
Тыва Республика талазы-биле Росхереглелхайгаарал эргелелиниң албан черлери чогуур документилери чок барааннарны садар садыглар-биле демиселди улам күштелдирерин Людмила Салчак чугаалаан. Чүге дээрге багай шынарлыг аъш-чем болгаш идик-хеп садып алганының дугайында хомудалдар ам-даа хөй.
Республикада тарадып садып турар барааннарның хыналдазын онлайн-чурумга чорудуп турар «Шынчы демдек» информастыг система-биле 2024 чылдың эрткен айларында чогуур документилери чок барааннарны Тывада садыглар четкизи дамчыштыр садарының 2 100 таварылгаларын илереткен.
Бистиң корр.
“Шын” №80 2024 чылдың октябрь 19