Фестивальдың байырлыг кезээниң бетинде, кожуун төвүнүң чагырга бажыңынга иви ажыл-агыйының сайзыралы болгаш ону деткиириниң дугайында “төгерик стол” болуп эрткен. Аңаа ТР-ниң Чазак Даргазының оралакчызының хүлээлгезин күүседип турар Айдың Чюдюк, ТР-ниң көдээ ажыл-агый сайыды Сергей Ондар, кожууннуң удуртулгазы болгаш ивижилер киришкен.
“Төгерик столга” баштайгы илеткелди Тываның көдээ ажыл-агый сайыдының бирги оралакчызы Олег Чаңгы-оол кылган. Ол бодунуң илеткелинге ивижилерниң амгы үеде байдалы, оларга ТР-ниң Чазаа болгаш Көдээ ажыл-агый яамызының талазындан берип турар күрүне деткимчезиниң дугайында дыңнаткан:
-Тожу кожуунда ийи организация - "Шулун" СПК биле "Өдүген" МУБ иви малды азырап өстүрүп турар. Амгы үеде ында ниитизи-биле 1257 баш иви бар. Иви ажыл-агыйын деткиири-биле сөөлгү чылдарда ТР-ниң Көдээ ажыл-агый яамызының талазындан ивижилерге снегоходтар, бураннар, майгыннар, рация, хүн херели-биле ажылдаар станция болгаш аъш-чем аймаа-биле доктаамал хандырып турган. 2022 чылда ниитизи-биле 7 сая рубльга үрдүрер хемелер, снегоходтар, спутник таварыштыр ажылдаар күштүг телефоннар, чылыг майгыннар, хүн херели-биле ажылдаар станцияны ивижилерге саткаш, үлээн. Бо чылын 1 баш иви дээш субсидия акшазы 1500 рубльдан 2236 рубль чедир өскен. Бо бүгү күрүне деткимчези иви малдың баш санын өстүреринче көрдүнген- деп, оралакчы сайыт илеткээн.
Тожунуң кожуун чагырыкчызы Буян Ондар чымыштыг ажыл-иштиг, чай-кыш чок тайга кезип, иви малын өстүрер дээш шудургу ажылдап чоруур ивижилерге четтиргенин илереткеш, оларның чараш байырлалы-биле изиг байыр чедирген. Улаштыр бодунуң кыска илеткелинге кожуун девискээринде 45 ивижи, оларның 44 хуузу аныяктар болуп турарын чагырыкчы демдеглээн.
“Төгерик столга” чыглып келген даргалардан ивижилер айтырыгларны салып, арга-сүмени база алганнар. Ылаңгыя ивижилерни эң-не дүвүредип турар айтырыглар - ажы-төлдеринге интернат тудуу, ТР-ниң Күш-ажыл яамызының шугуму-биле күрүне деткимчези, күрүне программаларын таварыштыр чурттаар оран-сава айтырыын шиитпирлежип бээрин дилээн.
Бистиң корр.
ТР-ниң Көдээ ажыл-агый яамызының медээзи-биле
