Сүт-Хөлдүң Бора-Тайга сумузунда губернатор төлевилели-биле “Эзирлер уязы” спорт залының тудуу кончуг дүрген чоруп турар.
Тудуг материалдарының келген шаа-биле чоннуң тудуун чаа өөредилге чылы эгелевээнде доозар сорулга салдынган. Бо хүннерде спорт залының соңгалары, эжиктери, шалазынга херек тудуг материалдары негеттинип турар. Херек чүүлдер кээрге-ле, чоннуң тудуун саат чок уламчылаарынга суурнуң чурттакчылары белен.
“Эзирлер уязының” Бора-Тайганың ниити билиглер школазының девискээринде туттунуп турарынга суурнуң чурттакчылары таарзынган. Чүге дээрге школачыларга күш-культура кичээлдеринде школадан ыравайн, боттарының девискээринде спорт залынга кичээлдер, спортчу секцияларже баарынга эптиг болуп турар.