Тываның Баштыңы Владислав Ховалыг социал болгаш орук инфраструктуразының объектилер тудуун дүргедедир даалганы берген.
Республикада чугула социал болгаш орук тудугларының акшаландырыышкынын мурнады хандырар. Ынчалдыр республиканың Чазаа бюджет чээлизи кылдыр немелде саң-хөөнү берип болур объектилерни федералдыг даңзыже киирерин чедип алган.
Владислав Ховалыг ТР-ниң Саң-хөө яамызының белеткээни бюджет бижилгезинче чогуур өскертилгени киирер дээн шиитпиринге атты салган.
Бадылаттынган графиктен мурнады беш объектини акша-хөреңги-биле хандырар: ооң үжүн 2023 чылда, артканын – 2024 чылда. Балгазын суурда база Кызыл хоорайның “Вавилин ээтпээ” микрорайонда школалар, Хүт суурда фельдшер-акушер пунктузунуң тудуу база Самагалдай суурда уруглар поликлиниказының капитал септелгези аңаа хамааржыр. Оон аңгыда, оруктар септелгезинче база тудуунче немелде акшаландырыышкын көрдүнген.
Республика тудугларын дүргедедиринче ниитизи-биле 949,2 сая рубль казна чээлизин алыр.
Россияның Президентизи Владимир Путин тудугнуң шапкын темпизин деткиир дээш, инфраструктура тудугларын мурнады акшаландырар механизмни 2023 чылдың эгезинде саналдаанын сагындыраал. Бөгүн регионнар ооң ачызында, бюджет дугайында хоойлу-биле бо чыл төнчүзүнде азы келир чылын казна чээлилериниң акша-хөреңгизин ап, ону тудугже ажыглаар аргалыг.
/ «ТМГ» Медээлер.
"Шын" №43 2023 чылдың июнь 14