Тываның Тудуг техникумунга чаа өөредилге чылынга болгаш Билиглер хүнүнге тураскааткан байырлыг чыскаал болган. Аңаа ТР-ниң Өөредилге яамызының методизи Линда Биче-оол, директорнуң хүлээлгезин түр када күүседип турар Аржаана Мөнделе, директорнуң оралакчылары Ляна Тарый болгаш Елена Разумова бирги курсчуларга байыр чедирген.
Бо чылын 315 оолдар, кыстар Тываның тудуг техникумунче документилерин дужаагаш, чогуур негелделерни болгаш шылгалдаларны эрткеш, сургуул болур аас-кежиктиг болганнар. Оларның аразында амгы үеде хүндүлүг дыштанылгада пенсионер Оюмаа Байыр-оолдуң уйнуу Байыр-оол Санге база бар. Кырган-ачазы Алексей Байыр-оолду база ачазын дөзээн шевер, чазаныр салымныг болган оглун кырган-авазындан аңгыда, авазы Шораана база кады төрээн кыс дуңмазы ортумак профессионал өөредилге черинче үдеп чедип келген.
Тываның Тудуг техникумунга болган байырлыг чыскаал доозулган соонда, «Оран-сава тудар база ону ажыглалга киирери», «Каңнакчы», «Архитектура» деп мергежилдерге бирги курсчуларны өөредип эгелээр куратор башкылары Ирина Гаджиева, Чодураа Сат, Оюмаа Сат, Валентина Шубина, Буян-кыс Донгак болгаш өске-даа башкылар аудитория, класстарже эдертип алгаш чорупкан. Аңаа чаа өөредилге чылы, сентябрь 1 — Билиглер хүнүнден аңгыда, өөредилге программазы, кичээлдерниң расписаниези, Тываның Тудуг техникумунуң оран-савазынга база өөредилге мастерскаяларынга таныштырылганы чоруткан.
Тываның тудуг техникуму чылдың-на янзы-бүрү мергежилдиг специалистерни өөреткеш, доостуруп турар ортумак профессионал өөредилге чери болур.
Мерген ОНДАР.
Авторнуң тырттырган чуруктары.
“Шын” №34 2026 чылдың сентябрь 3
"Шын" солуннуң МАХ-каналынга каттыжыңар: max.ru/channel_shyn