Кемерово хоорайда "Хостакчы дайынчыга" тураскаалда тыва маадырларның аттары.
Ада-чурттуң Улуг дайынынга турскааткан Кемерово хоорайда тудуп үндүрүп турар тураскаал комплекизинде тыва эки турачыларның аттарын сиилбип бижээниниң дугайында Тываның Баштыңы Владислав Ховалыг дыңнаткан.
"Хостакчы дайынчыга" деп сибиряк-маадырларга тураскаадып тудуп үндүрүп турар мемориалдыг комплексти көрдүвүс. Ол дээрге Берлин хоорайда Трептов парыгында монументиниң хоолгазы болуп турар. Ук тураскаалда дайынчының овур-хевирин Кузбасстан Николай Масаловтан үлегерлеп алган деп санаттынып турар болгай.
Тураскаал комплекизиниң стилобаттарын (тураскаалдың кезээ) тургускаш, Ада-чурттуң Улуг дайынының болгаш өске-даа чепсектиг тулчуушкуннарның маадырлары 3 муң сибиряктарның аттарын алфавит аайы-биле сиилбээн. Оларның аразында Тываның төлээлери база бар. Дараазында ээлчегде дайын-чаа үезинде амы-тынындан маадырлыы-биле чарылган сибиряктарның намдарын болгаш оларның дайынчы оруун, шаңналдарын бижип көргүскен музейни хүлээдири планнаттынган. Кузбасстың губернатору Сергей Евгеньевич Цивилев ук медээлерни чыып, киирер ажылга Сибирьниң бүгү өөредилге черлерин хаара тударын саналдап турар.
Ырак эвесте Томь хемниң эриинде сибирь кедрлериниң аллеязы бар Олимпийжи алдар парыгы чаттылган. Ооң чанында ийи улуг дээн спортчу объектилер - Урал артында эң-не улуг дээн 6 муң көрүкчүлерге "Кузбасс" дош ордузу болгаш 7,5 муң көрүкчүлер кире бээр ойнаар залдыг "Кузбасс-Арена" хөй хүлээлгелиг спорт комплекизи турар. Ында спорттуң 24 аңгы хевирлеринге өөредип турар. Серфинг кылыр кылымал чалгыг, Россияда эң-не бедик дээн аэрохоорза (22 метр) дээн ышкаш онзагай черлер база бар. Каа-Хем суурга спортчу-культурлуг төптүң тудуун доозарынга база ажыглалче кииреринге херек апарып болур коллегаларывыс арга-дуржулгазын өөренип көрүп тур бис" - деп, Владислав Ховалыг бодунуң социал четкилерде арыннарынга бижээн.
