Москва хоорайга уран чүүлдүң болгаш чогаадылганың V делегей фестивалы болуп эрткен. Аңаа Эрзин кожууннуң улусчу коллективи, хоочуннарның “Идегел” ыры ансамбли, Эрзинниң «Чинчилиг» деп мода болгаш идик-хеп театры болгаш ырының база самның «Эрзин» ансамблиниң ыраажылары Тываны төлээлээн.
Эрзинниң артистериниң күүселделерин фестивальдың жюри кежигүннери бедии-биле үнелээн. Тывадан барган шупту коллективтер номинациялар аайы-биле бирги черлерни алганнар. Фестивальдың кол шаңналын “Идегел” хоочуннарның ыры ансамблинге тывыскан.
«Чаңгыстың ыры» номинацияның хөй аңгы жанрлар төлевилелинге Эрзин кожууннуң Баштыңы, «Идегел» хоочуннар ансамблиниң солизи Игорь Ламажап «Мээң бажыңым Россия» деп ырыны күүсеткеш, I чергениң лауреады атка төлептиг болган.
«Хореография» номинациязынга «Агайлар» деп танцызы-биле «Идегел» ансамбли тергиидээш, I чергениң лауреаттары болган.
«Вокалдыг ансамбль» номинациязының I чергениң лауреадының дипломун база «Идегел» ансамбли «Самагалдай» деп ырыны күүсеткеш алган.
Ол ышкаш «Чинчилиг» мода болгаш идик-хеп театры «Төре-Хөлдүң чалгыглары» биле «Көшкүн кыс» деп коллекциязын бараалгаткаш, «Мода болгаш дизайн» номинациязының I чергениң лауреаттары болган. Коллективтиң удуртукчузу уран чүүлдүң алдарлыг ажылдакчызы Андрей Неверицкий биле элээди модель оолдар, кыстар жюриниң тускай шаңналын алганнар.
Төлевилелдиң организакчылары тиилекчилерге келир делегей мөөрейинге киржир чалалганы болгаш 50000 рубль түңнүг сертификатты тывыскан.
Эрзин кожууннуң чогаадыкчы коллективтер делегациязын Эрзин кожууннуң культура болгаш туризм эргелелиниң начальниги Ольга Куулар башкарып чораан. Коллективтиң хореограф-балетмейстерлери — ТР-ниң улустуң артизи Аян Мандан-Хорлуу биле ТР-ниң алдарлыг артизи Владлена Томур; «Идегел» хоочуннар ансамблиниң удуртукчузу — Долита Допчут; вокал репетитору — «Эрзин» ыры болгаш танцы ансамблиниң солизи, Эрзин кожууннуң алдарлыг артизи, Эрзин суурнуң Культура бажыңының уран чүүл удуртукчузу Сайлыккай Ондар.
Бистиң корр.
Чуруктарны интернеттен алган.
“Шын” № 45 2024 чылдың июнь 19
