Россияның иштинге аян-чорук: 2022 чылга көөрде, эрткен чылын Тывага кээп чораан туристерниң саны 26 хуу көвей болган.
Тыва Республика Россияның бойдус-чурумалдыг, бот-тускайлаң культуралыг, аъш-чемниг регионнарының бирээзинге хамааржыр. Тыва Республикада Туризмниң информастыг төвүнүң сан-медээзинден алырга, 2022 чылда республикага 138 000 кижи келген болза, 2023 чылда – 175 000 хире кижи. Россияның иштинге аян-чоруктуң кедилиин “Вебер” социологтуг агентилелдиң шинчилелдери база бадыткап турар.
Шинчилелдерниң түңнелдери-биле алырга, бистиң чурттуң чурттакчыларының чартыындан хөйү удаа-дараа аян-чорук кылып турар. Оларның иштинден хөй кезиинге — 62 хуузунга — аян-чорук кылырынга бойдустуң каас-чаражы идиг берип турар, айтырган кижилерниң үштүң биринге — барыктыг өртектер, а беш кижиниң бирээзинге-ле – транспорт-хөлгениң чедингири, чаагайжыдылга, арыг-силиг, дегбээн “черлик” черлерниң хөйү сорунзалап турар.
Беш кижиниң бирээзи-ле чааскаан аян-чорук кылырынга туралыг. Артканнары өөнүң ээзи азы эжи (47 хуу), өөрү (24 хуу), ажы-төлү (20 хуу) болгаш төрелдери-биле (14 хуу) кады.
Ол ышкаш “Вебер”российжилерниң саналы-биле эң сонуурганчыг, эң аар өртектиг болгаш эң чедингир черлериниң даңзызы-биле үлешкен.
Россияның эң сонуурганчыг 5 чери:
1. Байкал (48 хуу);
2. Алтай (34 хуу);
3. Ыраккы Чөөн чүк (32 хуу);
4. Карелия (30 хуу);
5. Крым болгаш Санкт-Петербург (29–29 хуу).
Россияның эң аар өртектиг 5 чери:
1. Сочи болгаш Краснодар крайның курорттары (46 хуу);
2. Москва (28 хуу);
3. Ыраккы Чөөн чүк (24 хуу);
4. Байкал (22 хуу);
5. Крым (19 хуу).
Россияның эң чедингир 5 чери:
1. Алдын дээрбектиң хоорайлары (18 хуу);
2. Адаккы Новгород (15 хуу);
3. Казань (14 хуу);
4. Карелия (10 хуу);
5. Санкт-Петербург, Сибирьниң болгаш Соңгу Кавказтың хоорайлары (9–9 хуу).
Айтырыгларга дүүштүр алырга, Россияның иштинге аян-чорукка идиг берип турар чүүлдер — төрээн черге ынакшыл, айыыл чок сагыш-хөөн, дыл талазы-биле шаптараазын чогу, ужудуушкундан кортпазы, даштыкы паспорттуң болгаш акшаның херек чогу.
89 регион – бот-тускайлаң аъш-чемниг 89 янзы-бүрү чер. Шөлээлээр бетинде мооң мурнунда четпээниңер регионнарже шыгааңар!
А. ХЕРТЕК белеткээн.
Чурукту интернеттен четкизинден алган.
«Шын» №41 2024 чылдың июнь 5