Чогаадыкчы үлетпүр школаларында 12 хардан 17 харга чедир уруглар халас өөренип турар. Янзы-бүрү чогаадыкчы болгаш чурагайлыг технологиялар-биле ажыктыг төлевилелдерни элээдилер кылып өөренип ап турар.
32 регионнуң аразынче Тыва Республиканың кире бергени өөрүнчүг. Ук программаны ТР-ниң Культура яамызы хүлээнип алган. Ынчангаш Аныяктар өргээзинде ындыг школа ажыттынган.
Ук школаларга үн режиссёру, электроннуг хөгжүм, фото болгаш видеомонтаж, 3D-графика, дизайн, VR болгаш AR интерактивтиг чурагайлыг технологиялар дээш алды угланыышкын бар.
Июнь 26–28 хүннеринде Москва хоорайга болган Бүгү-российжи «Креатон ШКИ – 2024» мөөрейге Тываның Чогаадыкчы үлетпүр школазы киришкеш, тускай шаңналды алган.
«Креатон ШКИ» – чогаадыкчы мөөрей. Москвага болган мөөрейге киришкен школачылар чурттуң улуг компанияларынга баргаш, чогаадыкчы бизнестерни канчаар тургустунганын сонуургап көрген. Россияның 15 аңгы регионундан 48 кижи мөөрейге киришкен. Тываның төлээлери өске 8 киржикчи дег, тускай шаңналдарны чаалап алган. Улан-Удэ болгаш Новокузнецск хоорайларның төлээлери мөөрейниң кол тиилекчилери болган.
/ ТР-ниң Культура яамызының медээлеринден.
Чуруктарны интернеттен алган.
“Шын” №50 2024 чылдың июль 6
