Сырып аргаан ээремчигей дузаа-даа дег,
Сайзыралдың четкизинге туттурза-даа,
Саазында чыскаап парлаан арыннарың
Шылырадыр ажып көрүп, номчуп чор мен.
Хүлбүс аткан одарындан аңчы эрниң
Хүннүң аңнаар дээни дег, үргүлчү-ле
Делегейниң четкизинде «Шыным» сени
Телефондан үргүлчү-ле көре бээр мен.
Хөлегеге олурупкаш, хөөн кирип,
Хөглүү кончуг анекдоттар номчугулап,
«Бодалдарның дизиин» база шүүреп, шишкип,
Бодумну-ла бодум билип алыксаан мен…
Кудажының бартаазынныг тоожузу
Кударанчыг барымдаалыг «Ыызын»-даа,
Шаравииниң «Салым-чолдуң шорааннарын»
Салдыкпайн, номчуп өскен солунум сен.
Меге, нүгүл барааныңдан эстип хайлыр
Чаагай чырык үүле-чолдуң суртаалчызы,
Мерген угаан, солун чогаал үүжези
Чашкы шаамдан холдан салбас солунум сен.
Шуудаңның ажылчыны Галя угбай
Суурувус кудумчузун эргий кезип,
Бөмбүрзектиң булуңундан бүгү медээ
Бөгүн дарый четсин дээнзиг, үлээр чүве…
Арыннарың ажып ора, төрээн Тывам
Ажыл-ишке, спорт, эртем, культурага
Чедиишкинин, тиилелгезин номчуптар мен –
Сеткилимни чалгынналдыр чүглеп бээр сен.
Эрим хайнып, ында-хаая бодум база
Эвээш-биче одуруг-даа кожупсумза,
«Шыным» сеңээ чырык көрүп үнүп кээрге,
Шылаан хөңнүм арыг аржаан сергеткен дег.
Диван орта «Шыным» туткаш олурупкаш,
Дискээм орта арыннарың чада салгаш,
Амдыы бижээн бир-ле шүлүүм көрүп кааштың,
Амырааным, өөрээним чүге деңнээр...
«Эрткен өйнү ажытпышаан…» төлевилел
Эгелеп каан Пушкин аттыг ном саңынга
Чуртталгавыс төөгүзү – «Шын» солунну
Чурагайже шилчидерин кыскан ийик бис…
Хайыралдыг октаргайның ойбунундан
Хаяалыг хүн челээш тыртып чайнаары дег,
Алыс хандыр бодаар болза, үүле-чолуң
Анаа чүгле солун эвес, оон-даа делгем:
Сактырымга, сен бар болза, тыва черге
Амыр-тайбың, аас-кежик төнчү чок дег.
Сактырымга, сен бар болза, тыва чонда
Амыдырал ынаныжы мөңге-даа дег...
Кара дүмбей, ажай-буурул үе дүпте,
Тыва бижик чырык черге турбаанда-ла,
Дыттың, пөштүң хөрзүн дежип өзери дег,
Тыптып келген салым-хууңну магадаар мен.
Үжүк туржук, үе-шагны бодуң мурнап,
«Үжүглел» бооп, башкы-даа бооп чораан-дыр сен.
Бурун тыва ёзу-биле алыр болза,
Буянны чыып, өргүп-үлээр назынныг сен.
Ачыр-дачыр девип үнер мөгелерни
Алгап-мактап, сорук киирип, шаңнал тыпсыр,
Өскелерге үлегер боор, даянгыыш боор,
Өөредилге ному ышкаш «Шыным»-дыр сен.
Чаңгыс борбак чавыдактаар аъдым ышкаш,
Чаңгыс борбак саап ижер инээм ышкаш,
Чаңгыс борбак хөңнүм сөглээр өңнүүм ышкаш,
Чарлып болбас хиним тудуш, «Шыным»-дыр сен.
Элеп читпес алдар-аттыг маадырлар –
Эрес-кежээ ажылчыннар дугайында,
Чалданыш чок дайынчылар дугайында
Чалбыыш от дег одуруглар өөскүп кыпсын!
Тыва чонну хей-аът киирип, демин каткан,
Тыва дылды ыдык сагып, кадагалаан,
Тыва чуртун алгап-йөрээп алдаржыткан
Тының быжыг, сорууң күштүг, солунум «Шын»!
Буян ЁНДАН.
13.05.2025 ч.
“Шын” №19 2025 чылдың май 22