Тываның Баштыңы Владислав Ховалыг национал төлевилелдер боттандырарынга тураскааттынган хуралга киришкен.
Россияның Президентизиниң Сибирь федералдыг округта бүрүн эргелиг төлээзи А.А. Серышевтиң удуртулгазы-биле Кемерово хоорайга национал төлевилелдерниң боттанып турарынга хамаарышкан хурал эрткенин Владислав Ховалыг дыңнаткан.
"Бодунуң удуртуп турар адырында ажылдың дугайында чугаалап бээри-биле, Кемерово хоорайже РФ-тиң кадык камгалал сайыды М.А. Мурашко боду чедип келген. Чоннуң өлүп-хораарын эвээжедир дээш Тываның күжениишкинниг ажылын ооң демдеглээни өөрүнчүг болду. Чидиг айтырыглар-биле ажылывысты ам-даа уламчылаар бис" - деп, Тываның Баштыңы чугаалаан.
В. Ховалыг 2022 чылда Россия Федерациязының девискээринде боттанып турар 15 национал төлевилелдерниң 11-инде Тыва киржип турар дээрзин чугулалап айыткан. Ол болза "Демография", "Өөредилге", "Чурттаар оран-сава болгаш хоорай хүрээлеңи", "Экология", "Айыыл чок шынарлыг оруктар", "Күш-ажылдың бүдүрүкчүлүү", "Чурагайлыг экономика", "Культура", "Делегей чергелиг кооперация болгаш экспорт" база "Биче болгаш ортумак сайгарлыкчы чорук болгаш хууда сайгарлыкчы эгелээшкиннерни деткиири" деп төлевилелдер болуп турар. Ол бүгү ажылче ниитизи-биле 8,5 млрд рубль көрдүнген. Федералдыг бюджет акшаландырыышкынындан аңгыда, республика бодунуң бюджединден 500 млн рубльди киириштирип турар. Ажылды боттандырарынга саң-хөө шиңгээдип алыр талазы-биле Тыва Сибирь федералдыг округта бирги черде турар дээрзин Тываның Баштыңы дыңнаткан.
"Хүлээп алдынып турар хемчеглерниң хоойлу-дүрүмге дүүшкен болгаш үре-түңнелдиг болуп турарының айтырыгларынче улуг кичээнгейни салган. Эрге-чагырга чери аңгы-аңгы адырларга аңгылаашкын чокка ниитизи-биле чоннуң амыдырал-чуртталгазының шынарын экижидери дээш харыылаар ужурлуг деп Анатолий Анатольевич Серышевтиң бодалынга бүрүнү-биле каттыжып тур мен, а национал төлевилелдер чоргаарланып болур түңнелдерни көргүзүп турар. Ол бисти нарын айтырыглар болгаш хууда чедиишкиннеривис-биле тус-тузувуста аңгыланып артып турбайн, чедип алган билиглеривисти каттыштырып, үре-түңнелдерни чедип ап турарынче кыйгырды.
Ведомстволар аразында кады ажылдажылганың чедиишкиннери дээш база саң-хөө мониторинг айтырыгларын шиитпирлээниниң үре-түңнелдери дээш Саң-хөө мониторинг чорудар федералдыг албанның "Деткимче дээш" мөңгүн медалы-биле шаңнаар дугайында чарлааны меңээ манавааным өөрүнчүг болуушкун болду. Саң-хөө мониторинг чорудар федералдыг албанның удуртукчузу Юрий Анатольевич Чиханчинге өөрүп четтиргеним илередип тур мен. Улаштыр ажыл-чорудулганы боттандырарынга улуг харыысалга, ынаныш кылдыр хүлээп алдым" - деп, Владислав Ховалыг дыңнаткан.
