Февраль 9-та В. Көк-оол аттыг Национал хөгжүм-шии театрынга Россияның хамааты авиациязының 100 чыл оюнга тураскааткан байырлыг хурал болуп эрткен.
Төөгүлүг болуушкунга келген аалчыларга ТР-ниң Баштыңының өмүнээзинден байыр чедирери-биле Тываның Чазааның Даргазының бирги оралакчызы Владимир Донских келген. “Хамааты авиациязының хүндүлүг ажылдакчылары болгаш хоочуннары! Силерниң хүндүткелдиг ажылыңарга солун маршруттарны, чаа-чаа бедиктерни, силерге болгаш чоок кижилериңерге кадыкшылды болгаш чаагай чорукту күзедим!” – деп, Владимир Донских чугаалаан.
“Хамааты авиацияның 100 чылын уткуп тура, бистиң республикавыстың төвү Кызылдан делегей чергелиг рейстерни организастаар ажылды чорудуп турар. Амгы үеде делегей чергелиг терминалды тургузуп турар. Улан-Баторже дорт ужар Кызыл – Улаангом – Улан-Батор маршрутту организастаар талазы-биле дугуржулгалар чедип алдынган. Бистиң республиканың авиация маршруттарының хөгжүп үнүп келир аргалары бар дээрзинге бүзүрээр мен. Тывага хамааты авиацияның төөгүзү хөгжүлдениң чаа чедиишкиннери-биле уламчылаар” – деп, Владимир Донских демдеглээн.
Тыва Республиканың Баштыңының Өөрүп четтириишкин бижиинге “Туваавиа” акционерлиг компанияның директорунуң оралакчызы В.Ю. Чихачев, Ми-8 вертолеттуң бортмеханиги И.Ф. Ланчиков, авиацияның радиоэлектри дериг-херекселиниң техниктиг хандырылгазының шынарын хайгаараар килдистиң инженери А.С. Куулар, Ан-2 самолеттуң ийи дугаар ужудукчузу А. В. Кара-Сал олар төлептиг болганнар.
ТР-ниң Дээди Хуралының (парламентизиниң) Даргазының Өөрүп четтириишкин бижии-биле Ми-8 вертолеттуң улуг бортмеханиги О.Н. Делик, авиацияның радиоэлектри дериг-херекселиниң кол инженери О.О. Пирингиле оларны шаңнаан.
ТР-ниң Орук-транспорт яамызының “Транспорттуң хүндүлүг ажылдакчызы” деп атты ужар чүүлдүң айыыл чогунуң талазы-биле кол инженери П.Н. Неумержицкий, авиация болгаш радиоэлектри дериг-херекселиниң хандырылгазының техниктиг инженери О.С. Оюнаров, Ан-2 самолёттуң ийи дугаар ужудукчузу А.Э. Ондар, “Тываавиа” акционерлиг ниитилелдиң хоочуну В.П. Толмачев оларга тывыскан.
Россияның Федералдыг Хуралының өөрүп четтириишкининиң бижии-биле Ми-8 вертолеттуң ийи дугаар ужудукчузу Б.М. Дукур, Ми-8 вертолеттуң бортмеханиктери А.А. Калын-оол болгаш Д.Р. Седипей оларны шаңнаан.
Чыжыргана СААЯ.
