Россияда Беларусь Республиканың Онза болгаш Бүрүн эргелиг элчини Дмитрий Крутой биле Тываның Баштыңы Владислав Ховалыг Белорусь биле Тываның садыг-экономиктиг, эртем-техниктиг биле социал-культурлуг кады ажылдажылгазының дугайында чазактар аразының дугуржулгазын чарган документиге аттарны салган.
Башкортостанның найысылалы Уфа хоорайда болуп турар Россияның регионнары биле Беларусьтуң Х форумунуң шөлүнге ук хемчег болуп эрткен. Аттар салыр езулалга Беларусь Республиканың Национал хуралының Республика Чөвүлелиниң даргазы Наталия Кочанова биле Россия Федерациязының Федералдыг Хуралының Федерация Чөвүлелиниң даргазы Валентина Матвиенко киришкен.
Беларусь Республиканың Президентизи Александр Лукашенко-биле кады ужурашкаш, чедип алган эрткен чылгы керээзин дугуржулга уламчылап, сайзырадырын ат салыр езулал үезинде Владислав Ховалыг бодунуң чугаазында демдеглээн. Садыг-саарылга, көдээ ажыл-агый продукциязының хандырылгазы, Белоруссияның заводтарында бүдүрүп турар тудуг болгаш даг ажылдарының аар техникаларын, механизмнерин садып алыры аңаа хамааржыр. 2022 чылдың мартта, Тываның найысылалында белорусс-тыва «БелТувТорг» садыг бажыңы» КХН-ни ажытканы – кады эштежилгени шуудадырынга баштайгы базым болган.
Садыг-саарылганы оон-даа сайзырадыры – кады ажылдажылганың планында. Владислав Ховалыг эрткен чылын Белоруська чорааш, «Беларус» тракторну бүдүрүп турар ат-сураглыг машина-трактор заводунга, Оршаның лён комбинадынга, "Устье" сүт-бараан комплекизинге, амгы үениң чогаадылга төптери - Минскиниң технопарыгы, Белоруссияның бедик технологиялар парыгы дээш, дыка хөй башкарыкчы бүдүрүлгелерге четкен. Тываның Баштыңы ол чорааш, сүт-бараан фермаларын тударынга дузалажып, арга-дуржулгазын дамчыдарын Беларусьтуң көдээ ажыл-агый болгаш аъш-чем сайыды Игорь Брыло-биле дугурушкан.
Дугуржулга чүгле үлетпүр бүдүрүлгезиниң, машина тудуунуң база агроүлетпүр комплекизиниң шугумунда эвес, а транспорт, чуртталга-коммунал ажыл-агый, информация технологияларының адырында компаниялар аразынга кады ажылдажылганы идепкейжидерин көрген. Александр Лукашенко Владислав Ховалыг-биле чугаалажып тура, Тывага каш удаа дыштанган Россияның президентизиниң сүмелээни езугаар, боду “ол тоолчургу чуртту” барып көөр күзелин илереткен.
Форумнуң парлалга төвүнүң дыңнатканы-биле алырга, дүүн Уфага, Башкортостанның Курултайы биле Тываның Дээди Хуралы (парламентизи) парламентилер аразында кады ажылдажылга керээзинге атты салганнар.
