Октябрь 30-ниң хүнүнде Улусчу чогаадылга бажыңынга Тыва дыл хүнүнге тураскааткан “Тыва дыл – чоннуң өнчүзү” деп шуулган болуп эрткен. Бистиң республикавыска чылдың-на ноябрь 1-ниң хүнүнде Тыва дыл хүнүн байырлап эрттирери чаңчыл апарганын билир бис. Бо удаа байырлалдың улуг хемчеглериниң бирээзин филология эртемнериниң доктору, профессор Шулуу Чыргал-оолович Саттың 100 харлаанынга тураскаадып эрттирген.
Ук хемчег “Тыва дыл - номнарда” деп делгелге-биле эгелээн. Ону Тываның гуманитарлыг шинчилелдер институду, ТР-ниң Национал музейи, Тываның күрүне университеди база Тываның ном үндүрер чери организастап эрттирген.
Тыва дыл хүнүнге тураскааткан хемчегни ТР-ниң Алдарлыг артизи, Улустуң хөөмейжизи, Улустуң артизи Андрей Монгуш игил-биле үдевишаан ажыткан. Ооң соонда ТР-ниң Чазааның Даргазының оралакчызының хүлээлгезин күүседип турар, ТР-ниң өөредилге сайыды Алексей Сазан-оол Тыва дыл хүнү-биле чыылганнарга байырын чедирип, 2024 чылдан 2033 чылга чедир Тыва дылды хөгжүдер күрүне деткимчезиниң стратегтиң программазының амгы үеде боттанылгазының дугайында түңнеп чугаалааш, чедиишкиннер бар-даа болза, ам-даа кылыр ужурлуг ажылдар хөй дээрзин сагындырган. Ооң соонда Тываның Баштыңының өөрүп четтириишкин болгаш хүндүлел бижиктерин республиканың шылгараңгай тыва дыл башкыларынга тывыскан. Улаштыр Дээди Хуралдың депутады Белекмаа Мунге бодунуң ээлчээнде тыва дылдың байдалының дугайында үзел-бодалын илереткеш, тыва дылды кадагалап арттырып, сайзырадыры-биле ажылдап чоруурларга база шаңнал бижиктерни тудускан.
Шуулганның бирги кезээ республиканың культура ажылдакчыларының ыры-хөгжүмнүг концерди-биле уламчылаан.
Чыжыргана СААЯ.
Буян Ооржактың тырттырган чуруктары.