Май 17-де Тыва Республиканың Чазааның чанында Тываның гуманитарлыг болгаш социал-экономиктиг тускай шинчилелдер институдунга 2024—2033 чылдарда тыва дылдың хөгжүлдезинге күрүне деткимчезиниң Эчис сорулгалары (стратегия) деп документини хүлээп алыр ажылчын хурал болуп эрткен.
Ук хуралды Тываның Баштыңының оралакчызының хүлээлгезин күүседип турар О.Д. Сарыглар удуртуп эрттирген. Хуралдың киржикчилери ук Эчис сорулгаларга хамаарышкан боттарының санал-оналдарын чугаалашканының түңнелинде, амгы тургускан хевирин улуг эвес эдилгелиг бадылаарын шиитпирлээннер.
Хуралга өөредилге сайыдының хүлээлгезин күүседип турар Е.В. Хардикова, Эртем талазы-биле агентилелдиң даргазы А.А. Стороженко, ТГШИ-ниң директору В.Д. Март-оол, Национал школалар хөгжүдер институттуң директору Е.М. Куулар, Тываның күрүне университединиң филология факультединиң деканы Н.Д. Сувандии, Тывамедиахолдингиниң директору Н.В. Сат, Тыва Республиканың чогаалчылар эвилелиниң даргазы С.М. Өндүр, филология эртемнериниң докторлары К.А. Бичелдей, М.В. Бавуу-Сюрюн, Б.Ч. Ооржак болгаш тыва дыл, чогаал талазы-биле эртемденнер, ажылчын комиссияның кежигүннери киришкеннер.
Тыва дылдың хөгжүлдезинге күрүне деткимчезиниң эчис сорулгаларын ТГШИ-ниң дыл эртемнериниң секторунуң эргелекчизи, филология эртемнериниң доктору Б.Ч. Ооржактың удуртулгазы-биле бөлүк эртемденнер ажылдап кылган.
Тыва дылдың хөгжүлдезинге күрүне деткимчезиниң Эчис сорулгаларның тыва болгаш орус дылда бижиттинген хевирлери-биле чон таныжып, санал-оналын киирер кылдыр Тываның Чазааның, ТГШИ-ниң, НШХИ-ниң, ТР-ниң Национал библиотеканың болгаш өске-даа албан черлериниң электроннуг арыннарынга болгаш социал четкилерге, солун-сеткүүлге салырын дугурушканнар. Июнь 1-ге чедир чоннуң санал-оналын өөренип көргеш, төндүр кылдынган Эчис сорулгаларны Тыва Республиканың Баштыңы ат салып бадылаар.
Эчис сорулгаларның кол сорулгазы – тыва дылдың ажыглалы кудулап, чоорту чидериниң айыылы тургустунуп турары-биле тыва дылды ниитилелдиң янзы-бүрү адырларынга күштелдирип сайзырадыры, ооң ажыл-чорудулгазынга күрүнениң деткимчезин алыры болур.
Тыва дылдың хөгжүлдезинге күрүне деткимчезиниң Эчис сорулгаларының төлевилелин адаанда кошкан капсырылгадан номчуур.
Эчис сорулгаларга хамаарыштыр санал-оналынарны dyltigpi@mail.ru деп адресче чорудуп болур.
/ Бистиң корр.
"Шын" №36 2023 чылдың май 20