Тываның школаларының 9-ку клазының доозукчулары тыва дыл эртеминге күрүне шылгалдазын дужааган. 2022-2023 өөредилге чылында тыва дылдың күрүне шылгалдазын 1486 доозукчу шилип алган. Оларның аразындан Чөөн-Хемчик кожууннуң 180 кижи тыва дылга күрүне шылгалдазын эрткен.
2014-2015 өөредилге чылында Тываның национал школа хөгжүдер институдунуң эртем ажылдакчылары тыва дылга күрүне шылгалдазын шенелдеже киирген турган. Оон бээр-ле 9-ку класстың доозукчулары боттарының күзели-биле тыва дылга күрүне шылгалдазын шилип турар апарган. Тыва-орус сөстүктерни шылгалда дужаар өрээл бүрүзүнге белеткээн.
Чадаананың 2 дугаар школазының 9-ку клазының өөреникчизи Менгилен Тюлюш физика биле тыва дылга күрүне шылгалдазын дужаар кылдыр шилип алган. Ол келир үеде эмчи болур күзелдиг. Физиканы эгезинден тура сонуургалдыг өөренип турар. Ооң сонуургаар темалары – механика, электродинамика.
Тыва дылга күрүне шылгалдазын Тываның доозукчулары, кижи бүрүзү, бодунуң төрээн дылын эки деңнелге билири база шылгалданы дужаап турары чугула дээрзин Менгилен Тюлюш демдеглеп турар.
Тыва дыл эртемин күрүне шылгалдазы кылдыр шилилге кылып турар доозукчуларның саны чылдан чылче көвүдеп турары өөрүнчүг. Эрткен чылын 599 өөреникчи тыва дылга күрүне шылгалдазын дужааган болза, бо чылын, 2023 чылда, 25 шылгалда дужаар черлерге 1486 өөреникчи ук эртемге шылгалданы дужааган.
Июнь 6-да 9-ку класстың өөреникчилери орус дылга күрүне шылгалдазын дужаар.
/Алиса ДОНГАК.
Начын АҢГЫР-ООЛДУҢ тырттырган чуруу.
