Бүгү-российжи «Чылдың өг-бүлези» мөөрейге Демир Дамчаа биле Инга Монгуштуң хөй ажы-төлдүг өг-бүлези тергиидээн. Олар Россияның Президентизиниң чарлааны Өг-бүле чылында ук мөөрейниң «Аныяк өг-бүле» деп номинациязының тиилекчилери болган. Бүгү-российжи мөөрейниң тиилекчизи болган өг-бүлени Москвадан ужуп келирге, чер-чуртунга байырымныг уткуп хүлээп алган.
Тываның Баштыңының чугаазы-биле алырга, бо өг-бүле 10 ажы-төлдү кижизидип өстүрүп турар. Демир Александрович «Транспортный сервис и проект» КУБ-туң бок сөөртүр машиназының чолаачызы, а Инга Владимировна Сукпак суурнуң Культура төвүнде ажылдап турар, башкы эртемниг специалист. Олар суурунуң хөй-ниити хемчеглеринде үргүлчү идепкейлиг киржип турар, чаагайжыдылга төлевилелдиң волонтёрлары. Өг-бүлениң ажы-төлүнүң өөредилгези эки, янзы-бүрү секциялар болгаш кружоктар барып турар.
Ол ышкаш Тывадан киржикчилер Бүгү-российжи «Чылдың өг-бүлези» мөөрейге бо ам 6 дугаар тиилекчи болуп турар дээрзин Владислав Ховалыг демдеглээн. Тывадан киришкен өг-бүлелер «Алдын өг-бүле», «Көдээ черниң өг-бүлези» база «Аныяк өг-бүле» номинацияларга тергиидээн.
Ук мөөрейниң регионалдыг чадазын чылдың-на Өг-бүле чылында эрттирери чаңчыл болган. Ооң лауреаттары 15 муңдан 50 муң рубль чедир акша сертификаттарын шаңналга ап турарлар. Ол ышкаш, Кызыл хоорайның Өг-бүле сесерлиинде Тываның үлегерлиг өг-бүлелериниң Хүндүлел самбыразын мөөрейниң тиилекчилериниң чуруктары каастаар.
А.СОЯН белеткээн.
Чурукту интернет четкизинден алган.
“Шын” №81 2024 чылдың октябрь 23
