Таңды кожууннуң Кочетов суурга Республика хүнүнге болгаш Тыва Республиканың парламентаризм хүнүнге тураскааткан байырлыг чыыш болуп эрткен.
Таңдының Суг-Бажы деп черин, амгы үеде Кочетов суурну Тываның күрүне эрге-байдалының кавайы деп адаары чөптүг. 105 чыл бурунгаар, 1921 чылда, маңаа болуп эрткен Тываның бүгү чонунуң чыыжынга бот-догуннаан күрүне — Тыва Арат Республиканың тургустунганын чарлап, баштайгы Конституцияны хүлээп алган. Тургузукчу хурал амгы үеде Дээди Хуралдың үндезинин салган. 2022 чылда аңаа тураскаадып, албан ёзузунуң хүнү – Тыва Республиканың парламентаризиминиң хүнүн тургускан. Оон аңгыда Суг-Бажы өске төөгүлүг болуушкуннар-биле база байлак. Ак гвардияның генералы Бакичтиң шериглерин чылча шапкан Сергей Кочетовтуң кызыл партизаннарының штавы шак бо черге турган.
Митингиниң киржикчилеринге хоочуннар байырын чедирип, чагыг-сөзүн берген.
«1921 чылда Тыва делегей чергелиг эргелиг субъект апарганынга тураскааткан кайгамчыктыг хемчегге киржип турарым дээш, аажок өөрүп тур мен. Бо дээрге Россия Федерациязының хөй-ле субъектилеринге үлегер-чижек болган онзагай болуушкуннарның бирээзи-дир» — деп, Тываның күрүне болгаш хөй-ниити ажылдакчызы Хонук-оол Монгуш чугаалаан.
Митингиниң киржикчилери республиканың күрүне тургузуунуң таваан салган өгбелерниң, ол үениң дайынчыларының, Ада-чурттуң Улуг дайынының фронтучуларының, интернационалист дайынчыларның болгаш амгы үеде тускай шериг операциязының маадырларының чырык адынга мөгейип, чечектер салыр ёзулалды кылган.
Шаг-үениң үзүлбес харылзаазының демдээ кылдыр Таңды кожууннуң чалыы чурттакчыларынга Россия Федерациязының хамаатызының паспорттарын тывыскан. Элээдилер кол документ-биле кады өгбелериниң маадырлыг чоруунга төлептиг болурун чагаан чылыг-чымчак сөстү хүлээп алган. Тываның төөгүзү – республиканың чурттакчыларын төрээн чериниң болгаш Ада-чуртунуң алдар-ады дээш чаа-чаа чедиишкиннерже сорук киирип, салгалдарны каттыштырып турар дириг тураскаал дээрзин Кочетовка болган байырлыг митинг херечилээн.
Бистиң корр.
Чурукту ТР-ниң Дээди Хуралының социал четкиде арнындан алган.
«Шын» №32 2026 чылдың август 20
"Шын" солуннуң МАХ-каналынга каттыжыңар: max.ru/channel_shyn