Уфа хоорайга апрель 24–27 хүннеринде 31 региондан 190 дыңнаары кошкак спортчулар аразынга Россияның дзюдо хүрежиниң чемпионады болуп эрткен. Аңаа тыва мөге кыс, Россияның хөй дакпыр чемпиону, “Олимп” спорт школазындан Джени Чамыян (тренери Вячеслав Монгуш) база катап бодунуң килинге чемпионнааш, 2025 чылда Японияга болур Сурдлимпий оюннарынга киржир эргени алганы улуг өөрүшкү.
Москва облазында Наро-Фоминск хоорайга апрель 29–30 хүннеринде Россияның бирги чери дээш 21 харга чедир уруглар аразынга спортчу хүреш маргылдаазы болуп эрткен. Аңаа бистиң республиканың мөге кыста- ры — 50 килге “Авырга” спорт школазындан Таана Түлүш база 59 килге олимпийжи курлавырлар спорт школазындан Менди Шогжал 3-кү шаңналдыг черже кирип, Россияның командазының кежигүннери болганнар.
Оренбург хоорайга апрель 29–30 хүннеринде Тиилелгениң 80 чыл оюнга база Ада-чурт камгалакчызының чылынга тураскааткан хостуг хүрешке Россияның Кубогу дээш кончуг солун, чаңчыл болган маргылдаа болуп эрткен. Аңаа бистиң республикадан 4 хоочун мөге хар-назы аайы-биле чедиишкинниг киришкеннер. Түңнелинде: 35–40 хар аразында мөгелерге 3-кү черни 88 килге Айдың Монгуш (Кызыл кожуун) база 130 килге Хартыга мөге Сонам Соян (Кызыл хоорай) алганнар; 50–55 харлыг мөгелер аразынга 70 кил чедир Айдың Куулар (Өвүр) база 88 килге Омак Кара-Сал (Кызылдың суд приставы) бирги черже үнүп, чемпион атка төлептиг болганнар.
Май 1–3 хүннеринде Новосибирск хоорайга2006–2007 чылдарда төрүттүнген оолдар аразынга Россияның бирги чери дээш спортчу хүреш панкратионга маргылдаа болуп эрткен. Аңаа Каа-Хем суурда школа-интернаттың өөреникчизи, олимпийжи курлавырлар школазындан Чаян-Кежик Монгуш 57 килге 2 дугаар черни ап, мөңгүн медальга төлептиг болган. Ол ышкаш 52 килге 3-кү шаңналдыг черже Чадаананың Ч.А. Монгуш аттыг ОКСШ-тан Сайын-Белек Сат кирген. База 5 шыырак мөгелер санынче ЦСКА-Тывадан Намзырай Кара-Сал база Санчай Ооржак, Ай-Хаан Домаа киргеннер.
Алексей ЧАМБАЛ-ООЛ, спорттуң хоочуну.
Чуруктарны интернеттен алган.
“Шын” №17 2025 чылдың май 8
