Апрель 26-дан 28-ке чедир республиканың база бир шылгараңгай хөгжүм коллективтериниң бирээзи – Тыва национал оркестрниң тургустунганындан бээр 20 чыл болган оюнга тураскааткан юбилейлиг хемчеглер болуп эртер.
Апрель 26-да 12:00 шакта Алдан-Маадыр аттыг Национал музейге оркестрниң чогаадыкчы ажылының дугайында делгелгениң ажыдыышкыны, оркестрниң партитура чыындызының 1-ги томунуң таныштырылгазы болур.
Апрель 27-де 16:00 шакта Тыва үндезин культура төвүнге “ Тыва национал оркестрниң келир үеде хөгжүлдези” деп темага төгерик столче киржикчилерни чалап турар.
Апрель 28-те В.Көк-оол аттыг Нацонал театрга тыва национал хөгжүм херекселдерин кылыр мастерлерниң болгаш графика дизайнери, чурукчу Алдынай Бурун-оолдуң ажылдарын делгээр. Оон аңгыда, 15.00 база 19.00 шактарда “Көшкүн араттың октаргайы” деп оркестрниң юбилейлиг концерттери болур.
Хөйге бидингир оркестр тыва этниктиг культураның база бир кол эдилекчизи, чогаадыкчызы болгаш дамчыдыкчызы деп санадыр. Оркестрни Кызылдың А.Б.Чыргал-оол аттыг уран чүүл колледжиниң доозукчулары 2003 чылда тургускан.
#Шынсолун#Тыванационалоркестр_20чыл#Тывакультура #TMG#Tuvanews
