Тыва поэзияның дээжизи

Александр ДАРЖАЙ
Тываның улустуң чогаалчызы

ДАГЛАРЫМ

Талыгырга чорааштың,
Дагларымны сактыр мен.
Танывазым кадарчы
Тааланчыг ырлай бээр.

Уяранчыг ырыдан
Уруг чаш шаам көстүп кээр.
Хаяларга өшкү дозуп,
Халып, маңнап чоруур мен.

Чеже харлар акпаан дээр,
Сеткилимге дагларым,
Ырак-даа бол, чанымда
Ыржым тыртып турарлар.

Даглар, даглар, дагларым –
Тааланчыг аялгам!
Дуруяалар дизии дег
Турлаам, черим чараш сен!

"Шын" №27 2023 чылдың апрель 15