Росхереглелхайгааралдың ТР-де эргелели биле ТР-ниң Кадык камгалал яамызының 2020 чылдың март 30-ниң 21.00 шакта берген медээзи.
Тыва Республиканың девискээринде аарыгны бадыткаан таварылгалар чок.
Республика эмнелгелеринде 33 кижи чыдар. Январьның 27-ден тура, аарыг нептерээн девискээрлерден келген ОРВИ-лиг 37 кижини халдавырлыг аарыглар эмнелгезинге чыттырган. 14 хонуктуң хүндүскү карантинин эрткен 21 кижини үндүр бижээн. Халдавырлыг аарыглар эмнелгезинде 16 кижи бар. Шупту анализтерниң харыылары анаа.
Кожуун эмнелгелеринде 17 кижи чыдар: «Барыын-Хемчиктиң КЭТ» – 5 кижи, «Эрзинниң ТКЭ» – 1, «Сүт-Хөлдүң ТКЭ – 1, «Чеди-Хөлдү ТКЭ» – 2, «Улуг-Хемниң» ТКЭ – 4, «Бай-Тайганың ТКЭ» – 4.
2020 чылдың январь 27-ден бээр обсервацияга 68 кижини чыттырган (аарыг бар девискээрлерден келген, аарыы бадыткаттынган кижилер-биле харылзажып турган, ОРВИ чок кижилер). Обсервациядан 55 кижини үндүр бижээн, ам-даа 13 кижи бар. Анализтериниң харыылары эки.
Республикада COVID-19 халдавырын илередир 1681 тест-система бар, ооң 1300-ү – ТР-ниң Кадык камгалалында, 381-и – ТР-ниң Гигиена болгаш эпидемиология төвүнде.
«Ак» база «Шивилиг» постулары таварты республикаже автотранспорттуг кирип турарларга термо-шинчилге чорудар санитарлыг контрольду организастаан. Кызылдың аэропортунда санитар зоназын база медицина пунктузун ажылдаткан. Ужуп кээп турар кижилерге анкеталарны долдуртуп, эъдиниң изиин хынап турар.
Красноярск – Кызыл, Иркутск – Кызыл авиарейстер-биле Кызылдың аэопортунга март 30-де ужуп келген 96 кижини шинчээн. Эъди изээн кижилер чок болган.
2020 чылдың март 31-де, эртенгиниң 06.00 шакка чедир, «Шивилиг», «Ак» постуларынга 1593 автотранспорт аймаан дозуп, 4518 чорук кижилерин эмчилер шинчээн:
– улуг кижилер – 3056,
– Тыва Республикаже чанып келген студентилер – 1138,
– назы четпээннер – 324.
2020 чылдың март 30-де “Ак” постулап чаңгыс-даа бичии кижи эртпээн.
Израильден келген, ОРВИ чок, бир херээжен кижини «Шивилигге» илереткен. Бадылаттынган чурум езугаар бажыңынга боду аңгыланыр аргазы чок болганы-биле, обсервацияга 14 хонуктуң карантинин эртер кылдыр чыттырган.
2020 чылдың март 29 база 30 хүннеринде республикаже кээп турар бичии уругларның база студентилерниң саны 20 хуу өскен.
#Шын