Июнь 28-те Москага “Чаңгыс демниг Россия” партияның XXIII шуулганының бирги чадазы болгаш Дээди чөвүлелиниң хуралы болуп эрткен. Аңаа Күрүне Думазынче депутаттың кандидаттарының даңзызын бадылаан. Болган шуулганга Тыва Республиканың делегациязы – ТР-ниң Баштыңы, “Чаңгыс демниг Россия” партияның Тывада регионалдыг салбырының секретары Владислав Ховалыг, ТР-ниң ДХ-ниң Даргазы, “Чаңгыс демниг Россия” партияның Тывада регионалдыг салбырының секретарының бирги оралакчызы Каң-оол Даваа, “Чаңгыс демниг Россия” партияның Тывада регионалдыг салбырының РДК удуртукчузу Аяс Мөңге, ТР-ниң культура сайыды Виктор Чигжит болгаш өске-даа кежигүннер регионалдыг салбырны төлээлеп киришкен. Оларның аразында баш бурунгаар бадылаашкынның тиилекчизи, Россияның Маадыры, ТР-ниң аныяктар херектериниң талазы-биле сайыт Буян Куулар база шуулганның ажылынга киришкен.
Шуулганга Күрүне Думазының IX Чыыжының депутадынче 600 ажыг кордакчыны, оларның иштинде 76 тускай шериг операциязының киржикчилерин идип үндүрген. “Чаңгыс демниг Россия” партияның федералдыг даңзызынче 57 регионалдыг бөлүктү тургускан. Ынаар РФ-тиң субъектилериниң амгы үеде удуртукчулары 55 кижи даңзыны баштаан. Күрүне Думазының IX Чыыжының депутадынче Тыва Республиканың чаңгыс мандаттыг округундан баш бурунгаар бадылаашкынның тиилекчизи, ТР-ниң аныяктар херектериниң талазы-биле сайыды Буян Кууларны кордакчы кылдыр идип үндүрген.
Пленарлыг хуралга Дмитрий Медведьев Күрүне Думазынче “Чаңгыс демниг Россия” партияның даңзызын баштаан беш лидерни таныштырган: РФ-тиң даштыкы херектер сайыды Сергей Лавров; Москваның мэри Сергей Собянин; Россияның Маадыры, ВГТРК-ның чиңгине директорунуң оралакчызы Евгений Поддубный; Россияның Президентизиниң чанында уругларның эрге-ажыын камгалаар бүрүн эргелиг төлээ Мария Львова-Белова; Россияның Маадыры, “Юнармия” Бүгү-россияның уруглар болгаш чалыыларның шериг-патриотчу хөй-ниити шимчээшкининиң кол штавының начальниги Владислав Головин.
Ол ышкаш партияның Улусчу программазы – 2021-ниң күүселдезиниң түңнелдеринге доктаап, чаа программаның документизинче 2,5 сая санал киргенин дыңнаткан. Тыва Республиканың чурттакчыларындан Улусчу программаже 6700 ажыг саналдар кирген.
“Владимир Владимирович Путин чурттуң хөгжүлдезиниң кол угланыышкыннарын айыткаш, чоннуң чаңгыс деминге үндезилээн социал чөптүг чорук болгаш харыысалгаларның деңи Россияның айыыл чок чоруун үр үеде хандырар дээрзин магадылап турар. Чурттуң Баштыңы соңгулда кампаниязының киржикчилеринге чон мурнунга дорт харыысалгалыг дээрзин сагындырган. Биске, кызыгаар чоогунуң региону Тывага, ол ориентирлер чугула” – деп, Владислав Ховалыг бодунуң социал четкиде арнынга бижээн.
Август айда партияның шуулганының ийиги чадазында “Чаңгыс демниг Россияның” соңгулда мурнунуң программазын болгаш чоокку 5 чылда боттандырар чаа Улусчу программа 2.0-тиң сөөлгү версиязын хүлээп алыр.
/ Бичен АНАЙ-ООЛ, “Чаңгыс демниг Россия” партияның парлалга секретары.
Чурукту ТР-ниң Чазааның парлалга албанындан алган.
“Шын” №25 2026 чылдың июль 2
"Шын" солуннуң МАХ-каналынга каттыжыңар: max.ru/join/egenQ...