Ыдыктыг Yш Эртинеге тейлеп, авырал-камгалалды диледим! Хүндүлүг чонум!
Силер бүгүдеге «Ыдык – ай» таварыштыр байырым чедирип тур мен. Чайныӊ башкы айыныӊ 15 чаада Будда башкывыстыӊ төрүттүнген, Чырыткы деӊнели четкен, Дываажаӊ оранынче чоруткан 3 дакпыр байырлал хүнүн бүгү делегейниӊ буддистери чыл санында байырлап эртирип турар. Сарыг шажынныӊ шупту хүрээлеринде улуг номналдарны номчуп, Будда башкывысты алгап-мактап, буянныг йөрээлдерни салып, өргүл-сөӊ кылып, тейлээшкиннерни кылып турар.
Будданыӊ арттырып каан ыдыктыг Өөредии 2600 чыл иштинде амылыгларга чырыткы болуп, аас-кежиктиӊ оруун айтып, амыр-чыргалды хайырлап чоруур.
«Ыдык айда» сагыыр чүүлдеривис – буянныг үүлелер: мага-бот, дыл-домак, сагыш-сеткилди арыглап, тейлээшкин кылып, өскелерге хора чедирбези, амылыг амытан тыны үспези, эъттиг чем чивейн, ногаа аймаа, ак чемнер чип, мага-ботту арыглаары чугула. База ол ышкаш эзиртир суксун арага-дары ишпезиӊерни кыйгырдым.
Будда башкывыстыӊ төрүттүнген, Будда байдалы четкен, Дываажаӊ оранынче чоруткан хүнүн – Тыва чоннуӊ байырлалы кылдыр хоойлужуткан. Бо чылын июнь 5-тиӊ хүнүнде ыдыктыг байырлалды эрттирер доктаалды Дээди Хурал хүлээп алган. Тываныӊ төп хүрээзи «Цеченлинге» болгаш өске-даа хүрээлерге хааглыг байдалга дорт дамчыдылга таварыштыр номналдарны эрттирер.
Чонумга база катап байырым чедирип, буянныг кежик-чолду, өөрүшкү-маӊнайны, быжыг кадыкшылды, бедик хей-аът, сүлдени сеткилим ханызындан күзедим!
Ыдыктыг Yш Эртине Силер бүгүдени камгалап, карактаар-ла болзунам! Курай-курай-курай!!!
#Шын