Ооргага чыдып алгаш аар шой көдүрер маргылдаага 83 кил чедир деңзиге он киржикчиниң аразынга ачыр-дачыр демиселдиң түңнелинде ийиги черни Свердловск хоорайның адын камгалап турар тыва спортчу Владимир Сат чаалап алган.
Май 25–26 хүннеринде Луганск хоорайга аар шой көдүрериниң талазы-биле Луганск Улус Республиканың чемпионады болуп эрткен. Россияның пауэрлифтинг федерациязының өмээржилгезиниң адаанга Луганскының регион салбыры дээш эң шыырак шой көдүрүкчүлери чыылган.
Владимирге пауэрлифтингиге маргылдаага киржилге ооң спортчу депшилгезинге бир дугаар көргүзүг болур. Ооң бетинде ол чиик атлетиканы болгаш ооң янзы-бүрү хевирлерин сонуургап турган.
«Маргылдаалар, ону эрттирип турар байдал болгаш кижилер мээң сеткилимге дыка таарышты, ооң дугайында чылыы-биле сактып чугаалаар мен. ЛУР-га каттыштырган девискээрлерден ынча хөй атлеттер киржир деп бодаваан мен. Бистиң команданың оолдары дээш дыка-ла аарыдым! Спортчу дүвүрел база турган болбайн аан, чүге дизе мындыг маргылдаага бир дугаар киржип тур мен, ынчалзажок тренерим мени тиилелгеже хөөн киирип, эргежок чугула сөстерни тып шыдаан, ол дээш аңаа четтиргеним илергейлеп чоруур мен» – деп, сагышта артып калган сактыышкыннары-биле Владимир үлежип турар.
“Маргылдаага белеткел дыка берге болган, ынчалза-даа бергелерден коргар кижи мен эвес-ле болгай мен. Профессионал ажыл-чорудулгамны спорт-биле капсырлаар ужурга таваржып турдум. Ол бүгү дээрге чүгле эгези-дир деп билип тур мен, чоокку үеде ооргага чыдып алгаш шой көдүреринден аңгыда, күш ажыглап, үш хевирге күжүм шенээр деп турар мен. Ону боттандырарда, шыңгыызы-биле белеткенир апаар” – деп, спортчу немеди.
«Шахтер» спорт комплекизиниң медээзинден.
Луганск хоорай.
“Шын” №39 2024 чылдың май 29
