Тыва Республиканың алдарлыг журнализи Роман Всеволодович Тас-оолдуң чырык өртемчейден чарлып чорутканын холбаштыр Тываның Баштыңы Владислав Ховалыг, республиканың Чазааның кежигүннери, ооң өг-бүлезинге база чоок кижилеринге ханы кажыыдалын илередип турар.
2025 чылдың март 23-те Тываның болгаш Россияның массалыг информация чепсектерин хөгжүдеринге бодунуң улуг үлүүн киирген хоочун журналистиң чүрээ аар аарыгның уржуундан турупкан.
Роман Всеволодович Тас-оол 1956 чылдың декабрь 30-де Тыва АССР-ниң Барыын-Хемчик районнуң Кызыл-Мажалык суурга Тываның бирги профессионал чурукчузу Всеволод Ламаевич Тас-оолдуң чогаадыкчы өг-бүлезинге төрүттүнген. Иркутскунуң күрүнениң университединге журналист дээди эртемни чедип алган. Роман Всеволодович чогаадыкчы мергежилиниң болгаш идепкейлиг хамааты туруштуң үлегери бооп, бүгү чуртталгазын бижик-сөске, күш-ажылга болгаш ниитилелге тураскааткан.
Ооң ажыл-ишчи базымнары телевидение болгаш радиодамчыдылга талазы-биле Тыва АССР-ниң Күрүне комитединге радио-корреспондент кылдыр эгелээн. Ооң соонда республиканың аңгы-аңгы массалыг-информация чепсектеринге, ооң иштинде «Тувинская правда» редакциязынга база Күрүнениң «Тыва» телерадио компаниязынга удуртукчулап ажылдаан. Сөөлгү чылдарында «Тывамедибөлүк» парлалга бажыңынга ажылдаан.
Роман Всеволодовичиниң профессионал болгаш чогаадыкчы ачы-хавыяазын хөй-хөй шаңналдар-биле демдеглээн, оларның аразында «Бүгү-российжи чон чизезин чорударынга ачы-хавыяазы дээш», «Шылгараңгай күш-ажыл дээш» деп медальдар, хүндүлел бижиктер база хүндүлүг аттар бар. 2023 чылдың январь 13-те, Россияның Парлалга хүнүнде, Тываның Баштыңы Владислав Ховалыгның Чарлыы-биле аңаа «Тыва Республиканың алдарлыг журнализи» деп хүндүлүг атты тывыскан.
Роман Всеволодович бүгү коллегаларының кайгамчыктыг дагдыныкчызы база мергежилиниң үлегери турган. Ол бодунуң мергежилинге ханы ынак болгаш эртем-билиин база дуржулгазын харам чокка үлежип чораан болгаш, аныяк коллегаларының хүндүткелин, ынакшылын чаалап алган. Олар боттары профессионалдар апарып, дагдыныкчы башкызының изин салгап, уламчылаан. Ооң кажан-бир удуртуп чораан коллективтери Роман Всеволодовичиге улуг хүндүткел-биле өөрүп четтирип чоруур.
Роман Всеволодович хөй талалыг талантылыг болгаш ханы билиглиг кижи чораан. Ол республиканың амыдыралында кандыг-даа берге айтырыгларны белен, билдингир болгаш бөдүүн кылдыр бижиптер салым-чаяанныг турган. Ооң бижээн чүүлдери номчуштуг болгаш шыырак билии, уран-чечени, өттүр сөглээни-биле кезээде ылгалып турган. Ол чугаа-сөске ынак чораан, бөдүүн ажылчындан эгелээш, улуг дужаалдыг удуртукчуга чедир, кандыг-даа кижилер-биле чугаалажып билир, шупту чүүлдү сонуургаар, амыдыралдың бүгү талаларын эки билир турган. Ынчангаш ооң бижээн чүүлдери мерген болгаш ханы уткалыг.
Роман Всеволодовичиниң өг-бүлезинге, эш-өөрүнге болгаш коллегаларынга ажыг-шүжүүн үлежип, ханы кажыыдалды илередип тур бис.
ТР-ниң Чазааның парлалга албаны.
«Шын» №11 2025 чылдың март 27