Чаа өөредилге чылында хоорай хевирлиг Каа-Хем суурда, Бай-Хаак, Чодураа суурларда, Чадаана, Кызыл хоорайның ийи микрорайонунда ниити өөредилге школалары ажыттынар.
Амгы үениң өөредилге албан черлерин 2024 чылдан бээр боттандырган «Өөредилге» национал төлевилел-биле, а Чодураа суурда школаны көдээ девискээрлерни комплекстиг хөгжүдери программа-биле туткан.
Чаңгыс аай төлевилел-биле туткан чаа школалар 825 олуттуг. Олар амгы үениң негелделеринге дүгжүп, өөрениринге таарымчалыг байдалдарны хандырган. Школа бүрүзү тренажёрлар, скалодром, волейбол, баскетбол шөлдери кирген ийи улуг спортчу залдарлыг. Оон аңгыда школа хериминиң иштинде спорттуң янзы-бүрү хевирлеринге ойнаар шөлдер база бичии өөреникчилер ойнаар черлерлиг.
300 ажыг олуттуг улуг залга янзы-бүрү культурлуг хемчеглерни эрттирер. Эртемнер кабинеттери амгы үениң дериг-херекселдери болгаш эт-сеп-биле дериттинген, өөредилге материалдарын болгаш солун практиктиг кичээлдер эрттиреринге чаа оруктар ажыттынган деп, башкылар демдеглээн. Өөреникчилерге төлевилел ажылдарынче шымнып киреринге онзагай байдалдар бар.
Чаа школаларның башкылары өөреникчилерин четтикпейн манап турарлар. Өөредилгениң шынарын бедидеринге, кичээлдерни солун болгаш үре-түңнелдиг эрттиреринге чаа аргалар идигни бээринге бүзүрелдиг.
А. МОНГУШ.
Чиңгис СААЯНЫҢ тырттырган чуруктары.
“Шын” №34 2025 чылдың сентябрь 4
