Тывада «Изиг чүрек–2024» деп хүндүткелдиӊ номунче кирген маадырларныӊ аттары билдине берген. Сугга дүшкен уругну камгалаан дузааргак сеткилдиг аныяк маадырлар Мэргэшир Бар-оол биле Дозураш Доштуг-оол, кем-херек үүлгедикчизинден танывазы херээжен кижини камгалаан Ринчен Сазанаков, полицейжилерге кем-херек үүлгедикчизин тударынга дузалашкан Найыр Салчак, сугга дүшкен эр кижини камгалаан Сагаан Сат база сугга дүже берген эр кижини маадырлыы-биле камгалаан Алдын-Херел Хѳлдүгбей оларныӊ аттары хүндүткелдиӊ номунче кирген.
“Аныяк оолдарныӊ бо чоруу дээрге, назы-хары аныяк, бичии-даа болза, эрес-дидим чоруктуӊ херечизи болур. Оларныӊ тѳѳгүзү шынчы чорук дээш туружунуӊ, кандыг-даа байдалда дуза кадарынга белен эрес-дидим чоруунуӊ дугайында чугаалап турар” деп, Тываныӊ Ѳѳредилге яамызы демдеглеп турар.
Оолдарныӊ маадырлыг чоруунуӊ дугайында дараазында айтыгдан долузу-биле таныжып болур силер: https://cordis.fondsci.ru/pochetnaya-kniga/
“Изиг чүрек” деп Бүгү-российжи хѳй-ниити күрүнениӊ эгелекчи саналы 2013 чылдан тура Россияда боттанып турарын сагындырып каалы. Ооӊ кол сорулгазы хамааты хүлээлгезин идепкейлиг кѳргүзүп, амыдыралдыӊ берге байдалынга таварышкан улуска сагыш-сеткилинден дузазын каткан уругларга болгаш 23 харга чедир аныяктарга хүндүткелди кѳргүзери болур.
Тываныӊ Ѳѳредилге яамызыныӊ медээлеринден
Чурукту интернет четкизинден алган.