Бо хүнде Тываның девискээринде 28 арга-арыг өрттери болуп турар. Август 24-25 хүннеринде кандыг ажылдар чоруттунганын республиканың арга-арыг ажыл-агыйы болгаш бойдус ажыглалының сайыдының албан-хүлээлгезин күүседип турар Григорий Ондар дыңнаткан.
Амгы үеде байдал нарын хевээр артпышаан, албан черлер каттыжып алгаш, бүгү хемчеглерни чорудуп турар. Бо шакта дөрт улуг өрт долузу-биле өжүртүнген.
“Тес-Хем, Тожу, Шагаан-Арыгның болгаш Чадаананың арга-арыгларында болган өрттерни өжүрүп доостувус. Өрт өжүрер ажылга Арга-арыг яамызының, аңаа хамааржыр албан черлерниң ажылдакчылары, 70 эки турачы, ОБЯ-ның 10 ажылдакчызы болгаш Россияның өске регионнарындан Агаардан арга-арыг камгалаар чериниң 140 ажылдакчызы киржип турар. Өрт өжүрер нарын-берге ажылга киришкен кижи бүрүзүнге өөрүп четтиргенивисти илередип тур бис” – деп, Григорий Ондар чугаалаан.
Тывада өртке удур Томск областан, Красноярск биле Забайкальск крайлардан, Бурят, Хакас республикалардан келген агаардан арга-арыг камгалаар чериниң 140 ажылдакчызы идепкейлиг ажылдап турар. Келген аалчылар өрттү долузу-биле өжүреринге чедир Тывага ажылдаар.
Бо хүн Россияның арга-арыг ажыл-агыйы чуртта болуп турар өрттерниң байдалын хайгаараар федералдыг штабты тургускан. Хурал үезинде Росгидрометериалогияның ажылдакчылары боттарының хайгааралы-биле үлежип, Тывада час чок, кургаг кааң байдал уламчылаарын дыңнатканнар. Ынчангаш, өрттү өжүреринге ам-даа шыңгыы хемчеглер алдынары көрдүнүп турар деп, Григорий Ондар дыңнаткан.
ТМГ-ниң медээлеринден.
