Тываның ном үндүрер чериниң хериминиң иштинде Тывада бир дугаар онзагай тураскаалды тургускан. Ол дээрге номга тураскаал болур. Ук тураскаалды чүгле номга эвес, а Юрий Шойдакович Кюнзегештиң 95 харлаанынга база чогаалчыларга тураскааткан.
Аңаа культура сайыды В. Чигжит, К.А. Бичелдей база Юрий Шойдакович Кюнзегештиң өөнүң ишти, төрелдери, республиканың чогаалчылары байырлалдың эгелекчилеринге байырын чедирип, тураскаалды ажыткан. Ук байырлал Ю.К. Кюнзегештиң өг-бүлезиниң, ТР-ниң Культура яамызының, Тываның ном үндүрер чериниң, А.С.Пушкин аттыг национал ном саңының эгелекчи саналы болган.
Ю.Ш. Кюнзегеш Тываның ном үндүрер черинге 37 чыл редактор болуп ажылдаан. 2005 чылдан тура Тываның ном үндүрер чери ооң адын эдилеп чоруур. Ол хөй-хөй номнарны редакторлап, чырыкче үндүреринге дорт хамаарылгалыг болган.