2023 чылдың январь 18-тен эгелеп, республикада «Блокада хлеви» деп Бүгү Россияның сактыышкын акциязы эгелээн. Акция дайзын эжелекчилерниң миллион дугаар хоорайының туруп көрбээн бүзээлээшкинин чурттап эрткен Ленинградтың чурттакчыларының эрес-дидим чоруунуң дугайында сагындырары-биле кыйгырган.
Ленинградтың бүзээлээшкини 872 хүн үргүлчүлээн. Бо анаа эвес сан – бүзээлеттиргеннерниң амыдыралында хүн бүрү берге шенелде болган. Аңгы-аңгы санаашкыннар-биле, хоорайга 692 муңдан 1,5 миллион чедир кижи чок болган – оларның 97 хуузу аштан чок болган. Эртенги хүнче чаңгыс-ла идегел хлеб турган. Борбак хлеб чоорту 125 грамм кезек апарган – шак-ла ол хире кезек бүзээлеттирген Ленинградтың чурттакчыларынга хлеб үлеп бээриниң эң-не эвээш үлүү апарган.
125 грамм хлеб кезээн үлээр акцияга республиканың чурттакчылары идекпейлии-биле киржип турар.
Өөредилге яамызының медээзи-биле Алиса ДОНГАК белеткээн.
Чуруктарда Балгазынның ортумак өөредилге чери биле Кызылда эмчи колледжизиниң сургуулдары
