2024 чылдың эгезинден Тываның 11 муң чурттакчызы диспансеризацияны база профилактиктиг шинчилгелерни эрткенин регионнуң Кадык камгалал яамызы дыңнаткан. Президент В.В. Путинниң инициативазы-биле боттандырган «Кадык камгалалы» национал төлевилелдиң хемчеглеринче диспансеризация база профилактиктиг шинчилгелер кирип турар. Бо чылдың үш айында шинчилелгелер үезинде 4436 аарыг кижи бүрүткеттинген, оларның 888-инде – аарыг бир дугаар деп тодараттынган. Диспансер хайгааралында 3992 кижини алган, оларның 2348-и – чүрек-дамыр системазының, 185-и – тыныш органнарының аарыгларындан аарып чоруур болган.
Апрельдиң 7-де, бүгү-делегейниң Кадыкшыл хүнүнде, Кызыл хоорайга эрткен регионнар аразының шуулган үезинде чурттакчы чонну калбаа-биле шинчээн. Регионнуң Баштыңы Владислав Ховалыгның Тывада чарлааны Кадык чылында шуулганны организастап эрттирген. Шуулган үезинде күзелдиг кижилер БЦА УЗИ-зин, ВИЧ-ке экспресс-анализти, ханда холестерин болгаш чигирниң деңнелин, маммографияны, флюорографияны болгаш өске-даа шинчилгелерни эртер арганы ажыглаан.
Диспансер шинчилгезиниң түңнелинден көөрге, шын эвес чемненилге – 24 хуу, таакпылаашкын – 23,7 хуу, артык кил – 10,6 хуу хан-дамыр системазының база тыныш органнарының, ыжыктар, чигир аарыы болгаш өске-даа аарыгларның тыптып турарының кол чылдагааннары бооп турарын Кадык камгалал яамызы дыңнаткан.
Чыл эгезинден чоруткан диспансерлиг база профилактиктиг шинчилгелер үезинде хоралыг ыжыктарлыг 17 таварылганы эмчилер илереткен.
Сөөлгү чылдарда республиканың кадык камгалалының бирги звенозунуң албан черлери «Кадык камгалалы» национал төлевилелиниң кадык камгалалының бирги звенозун модернизастаар программазы-биле диспансеризацияга ажыглаар дериг-херекселдер-биле четчелеттинген. Тываның эмнелге албан чери сөөлгү дөрт чылда 380 ажыг дериг-херекселдерни садып алган.
Аарыгларны эрте чадазында тодарадыр дээш, чурттакчы чонну диспансеризацияже калбаа-биле хаара тудуп турарын сагындыраал. Диспансеризацияны 18 хардан өрү назылыг кижилер үш чылда бир катап, 40 хардан өрү назылыглар – чыл санында эртер.
Чуруктарны интернет четкизинден алган.
