Тывада «кракен»

ТР-ниң кол санитар эмчизи Людмила Салчак республикада коронавирус халдавыры-биле аараан кижиниң ханын шинчээн соонда «омикрон» коронавирус халдавырының «кракен» хевири илерээнин дыңнаткан.

Регионну быжыглаан Иркутскунуң чумага удур институдунга биологтуг материалды хынаанын Росхереглелхайгааралының регионда эргелелиниң удуртукчузу дыңнаткан. Шинчилелдиң түңнели январь төнчүзүнде келген. Республикадан дашкаар чораан херээжен кижи аараанын эпидемиологтуг истелге илереткен. Аарыг кижиниң чоок харылзаалыг кижилери – өг-бүлезиниң, ажылдап турар коллективиниң кежигүннеринде аарыг кижилер илереттинмээн. Аарыг кандыг-даа бергедээшкин чокка, чиик эрткен. Үезинде тарылга албаанындан, иштиг кижи аараан болган. Аарыг кижи долу амбулаторлуг эмнээшкинин алган, январь 25-те эмнелгеден үндүр бижиткен.

Чурттакчы чоннуң кракен-биле аарып турары Тывада бир дугаар таварылга, а Россияда ийи дугаар таварылга болуп турар. Амгы бо үени алгаш көөрге, коронавирус халдавырындан аарыыр чорук январь 26-дан хүн бүрүде көвүдеп турарын кол санитар эмчи демдеглээн. Ооң мурнунда неделяда 56 таварылга демдеглеттинген болза, эрткен неделяда 89 четкен. Колдуунда 30-ден 49 хар назылыг болгаш 7 – 14 харлыг уруглар аарып турар. Бичии уруглардан аарып турарларның үлүү – 30,7 хуу.

Эрткен неделяда ОРВИ-ден аараан 1035 таварылганы бүрүткээн, ооң мурнунда үеге бодаарга, 39,5 хуу хөй.

Эмнелге, социал албан черлерде, хөй кижилер чыылган черлерде хууда камгалал чүүлдерин (камгалал маскалар) албан ажыглаар дугайында ТР-ниң Баштыңының чарлыы республика девискээринде ам-даа күштүг дээрзин кол санитар эмчи сагындырган. Айыттынган организацияларның талазындан ол негелделерни сагып турарының хыналдазын күштелдирер. Организацияларга, ылаңгыя өөредилге албан черлеринге, эртенги «шүүрнү» чорудуп, арыглаашкын ажылын күштелдирер негелде хевээр.

Уруглар хаара туткан коллективтер: школаларда, уруглар садтарында база өске-даа социал албан черлеринде профилактика хемчеглерин сагып турарынга онза хыналданы чорудар.

Коронавирус инфекциязын чыпшырган таварылгалар көвүдээни-биле, катап тарыдар үезин эрттирбейн тарыдып алырын чурттакчы чонга Тываның Баштыңы Владислав Ховалыг сагындырган. Күш-ажылчы коллективтерниң удуртукчулары ол айтырыгны чогуур хыналдага алырын губернатор дааскан.

Алиса ДОНГАК белеткээн.