Тывада ОРВИ болгаш грипптен аарыыр чорук көвүдээниниң дугайында республика Баштыңы Владислав Ховалыгга Росхереглелхайгааралдың Тывада эргелелиниң удуртукчузу Людмила Салчак илеткээн. Эрткен неделяның оперативтиг мониторингизиниң түңнелинден алырга, регионда чеди хонукта 210 кижи аарааны бүрүткеттинген, ооң мурнунда неделядан 70 кижи хөй. Аараан улустуң аразында 14 хар чедир назылыг 40 уруг бар.
Владислав Ховалыг байдалды сайгарган соонда, сезоннуг гриппке удур тарылга кампаниязын элээн дүргедедир даалганы республиканың Кадык камгалал яамызынга берген. Вакцинация оожум чоруп турар муниципалитеттер – Улуг-Хем, Чөөн-Хемчик база Барыын-Хемчик кожууннарже онза кичээнгейни салыр.
Чурттакчы чоннуң 60 хире хуузун азы 202,6 муң кижи, ооң иштинде айыылдыг бөлүкте кижилерниң 75 хире хуузун бо күзүн тарыыр ужурлуун эмчилер дыңнаткан. Амгы үеде херек ужурлуг вакцинаның 80 хире хуузун, 150 муң ажыг хире тарылганы салганын Кадык камгалал яамызы республика Баштыңынга дыңнаткан. Тывага коллективтиг иммунитетти ажылдадырда, чоннуң үштүң бир кезээ хирезин – 58 муң ажыг кижини тарыыр.
COVID-19-биле байдал амдыызында ажырбас. Сентябрь 23-ке чедир чаа коронавирус халдавырындан аараан 13 таварылга бүрүткеттинген, алдызы – 17 харга чедир уруглар. Халдавырлыг аарыг эмнелгезиниң стационарлыг эмнээшкининде COVID-19 деп диагнозтуг 6 кижи чыдар.
ТР-ниң Чазааның парлалга албаны.
“Шын” №73 2024 чылдың сентябрь 25
