Тывада өртке удур онза чурумну сентябрь 10-дан 30-ге чедир узаткан. Республика Чазааның чогуур доктаалын сентябрь 9-та регионнуң албан езунуң порталында парлаан. Бо чылдың апрель 12-де онза чурумнуун кииргенин, бо үеге чедир ону алды катап узатканын сагындыраал.
«Тыва Республиканың чурттакчылыг черлериниң болгаш өнчүнүң аңгы-аңгы объектилериниң өртке удур камгалалын быжыглаар, өрт айыылының деңнелин эвээжедир, улуг арга-арыг азы техногенниг өрттерни болдурбас сорулга-биле» чурумну кииргенин документиде тайылбырлаан.
Өртке удур онза чурум үезинде арга-арыгга хамаатыларның чоруурун, ынаар транспорт аймааның кирерин, арга-арыгга, көдээ ажыл-агый ажыглалдыг черлерге, куруккан черлерге, хову шөлдерге одаг кыпсыры, кургаг оът-сиген, боктар өрттедири хоруглуг.
Өртке удур онза чурум үезинде арга-арыгга өртке удур айыыл чок чоруктуң чурумнарын үрээн таварылгада административтиг торгаалдарны онаар.
Республикада өртке удур онза чурум-биле чергелештир арга-арыгларда регионалдыг деңнелдиг чурум ажылдап турар. Арга-арыгда байдал хенертен баксыраанындан регионнуң Баштыңы Владислав Ховалыгның август 17-де шиитпири-биле ону киирген.
Сентябрь 9-та Тываның арга-арыг фондузунуң черлеринде 25 267 га шөлде 9 арга-арыг өрттери хып турар. 2024 чылда өрт айыылының сезону эгелээнинден 41151,39 га ниити шөлдүг 202 арга-арыг өрттери бүрүткеттинген. Эрткен чылдың бо үезинде 3581,5 га шөлге 96 арга-арыг өрттери болган турган.
Бистиң корр.
«Шын» №69 2024 чылдың сентябрь 11