ТР-ниң Чонну ажылга хаара тудар төвүнүң 16 девискээр салбырларында база социал угланыышкынныг дөрт объектиде септелге ажылдары майның эге хонуктарындан эгелээнин регионнуң Күш-ажыл болгаш социал политика яамызы дыңнаткан.
«Каптудуг» КХН, «Кристалл Плюс» КХН база Менги Бады-Суурнуң ХБ тудуг организацияларының тудугжулары Барыын-Хемчик, Улуг-Хем база Өвүр кожууннарда өг-бүлеге болгаш уругларга социал дуза төптериниң капитал септелгезин кылып эгелээн. «Орбита» КХН Чагытай хөлдүң эриинде «Байлак» уругларның кадыкшылга лагеринде эде тудуушкун ажылдарында. Тудуг организациялары-биле 930 муңдан 6,7 млн рубль чедир түңге күрүне керээлерин чарган. Тыва Республиканың Баштыңы Владислав Ховалыгның дорт даалгазы езугаар, республика бюджединде боттуң акша-хөреңгизи-биле ол объектилерниң акшаландырыышкынын бүрүн хандырар.
«Демография» национал төлевилелдиң «Ажылга хаара тударынга деткимче» федералдыг төлевилел шугумунда кадр албанының шынарын бедидер хемчеглер күүселдези-биле Чонну ажылга хаара тудар девискээр килдистери агар септелгени кылыр. Ол сорулгага федералдыг бюджеттен 38,5 млн. рубльди угландырган. «Каптудуг» КХН Кызылдың девискээр килдизинде септелге ажылдары колдуунда (90 хуу) доозулган. Арткан объектилерде ажылдарны июнь төнчүзүнге чедир доозарын планнаан.
Оон аңгыда, «Демография» национал төлевилелдиң «Улуг салгал» федералдыг төлевилел күүселдези-биле, эмчи болгаш амыдырал-хандырылга өрээлдерлиг, 180 оруннуг чаа бажың-интернатты тудар ажылдар апрельде Каа-Хем кожуунунуң Дерзиг-Аксы суурда эгелээн. 2025 чылда дужаарын планнаан объектиже федералдыг болгаш республика бюджеттеринден 1,3 млрд ажыг рубльди үш чыл дургузунда тускайлаар.
«Бастион» тускайлаттынган тудуг» КХН-биле бажың-интернат тудуунуң күрүне керээзи чардынган, бо хүнге чедир тудугжулар чылдың лимидиниң 60,6 хуузун, азы 354 млн рубльдиң акшаландырыышкынын алган. Объектиде түр ажыглал тудугларын болгаш оран-саваны тургузар, девискээрни аштап, тудуг боктарын чүдүрүп, таваан кудар оңнарны таптап, видеохайгаарал системаларын эптеп тургузар ажылдар чоруп турар.
Төлевилел езугаар Дерзиг-Аксының чаа бажың-интернады социал дуза алыкчыларының хереглелдеринге бүрүнү-биле дүүшкен, таарымчалыг, улуг делгем оран-сава болур. Комплекстиң төп кезээнге ийи каът административтиг бажың, кыдыгларынга 180 оруннуг үш каът чуртталга бажыңнарын тудар. Тудуг объектизиниң ниити шөлү — 6800 дөрбелчин метр.
Тываның Чазааның парлалга албаны.
