Республика Баштыңының даалгазы ёзугаар Тываның Экономиктиг сайзырал болгаш үлетпүр яамызы «Тардан Голд» алдын-тывыш компаниязы-биле «Даг херээ» угланыышкынга индустриалдыг партнёр кылдыр «Профессионалитет» федералдыг программага киржириниң дугайында дугуржулганы чарган. «Аныяктар болгаш уруглар» национал төлевилелдиң кезээ болур «Профессионалитет» программа Россияда экономиканың кол адырларынга мергежилдиг кадрларны белеткээр сорулгалыг болгаш ортумак профессионал өөредилгени чаартырынче угланган.
Программа ортумак профессионал өөредилге албан черлериниң болгаш бүдүрүлгелерниң аразында сырый кады ажылдажылганы, кыскалаткан үелиг өөредилгени болгаш өөредилгени бүдүрүлге байдалдарынга херек кырында чорударын хандырар.
Тывада «Профессионалитет» федералдыг төлевилелдиң киржикчилери – Ак-Довурактың даг техникуму биле Тываның тудуг техникуму 2025 чылдың сентябрь 1-де өөредилге-бүдүрүлге төптерин ажылдадып эгелээр.
«Тардан Голд» КХН-биле техникумнарның даг-тывыш кластеринде кады ажылдажылгазы элээн каш угланыышкыннарга боттаныр.
Бирги угланыышкын – практикаже угланган өөредилге. Компания бодунуң бүдүрүлгелеринге практика эртер баазазын бээр. Дагжы мергежилдер сургуулдары компанияның дуржулгалыг дагдыныкчыларының удуртулгазы-биле мергежилди шиңгээдир.
Ийиги угланыышкын - доозукчуларны ажылче хаара тудары. Өөренири шыырак доозукчулар «Тардан Голд» компанияга ажылчын олуттарны алыры магадылалдыг. Компания 2025-2026 өөредилге чылының төнчүзүнде шак ынчалдыр баштайгы аныяк специалистерни ажылга хаара тудар планныг.
Амгы үениң өөредилге негелделерин боттандырары — үшкү угланыышкын. Компанияның специалистери өөредилге программаларын ажылдап кылырынга киржир, бүдүрүлгениң амгы негелделеринге дүгжүп турарын хандырар. Кады ажылдажылга керээзи езугаар Ак-Довурактың даг техникумунда тускай лабораторияны чепсеглеп, компанияның бүдүрүлгелеринге өөредилге шөлдерин аңгылап, сургуулдарга чылдың-на стажировканы организастап, адырның мурнакчы специалистериниң мастер-класстарын эрттирер.
«Профессионалитетке» киржилге – адырның кадрлар курлавырын четчелээринге бистиң үлүг-хуувус-тур. Амгы үениң бүдүрүлге баазазы-биле сургуулдарны хандырып, ажылга хаара тударын магадылаарынга белен бис» - деп, «Тардан Голд» компанияның чиңгине директору Сергей Байкалов демдеглээн.
Тываның Өөредилге яамызының дыңнатканы-биле, регионнуң даг-тывыш компанияларынга специалистер белеткээр 45 өөредилге программаларын «Профессионалитет» шугуму-биле боттандырар. 2025-2026 өөредилге чылында ниитизи-биле 600 кижини ынаар хүлээп алыр ужурлуг. А 2027 чылга чедир «Профессионалитет» төлевилелдиң даг-тывыш, транспорт болгаш тудуг адырларынга бир муң беш чүс хире ортумак эртемниг специалистерни белеткээри планнаттынган.
ТР-ниң Чазааның парлалга албаны.