Тывада туризм.

Туриндустрияның эксперттери «Сибирь дыштанылгалары» национал маршруттуң Тывада объектилеринге үнелелди берген.

Россияның аңгы-аңгы регионнарындан турисчи компанияларның төлээлери “Сибирь дыштанылгалары” национал турисчи маршрут талазы-биле Ростуризмниң информастыг турун боттандырып, эрткен неделяда республикага келгеш барган. Аалчылар маршрутта Красноярск край база Хакасияны таварааш, Тываның маршрудунда онза солун черлер-биле танышкан. Таныжылга соонда “төгерик столду” организастап, чаа турисчи оруктуң дугайында бодалдарын солчуп, солун турисчи программаны тургузар талазы-биле санал-оналдарын болгаш сүмелерин киирип, ооң перспективазынга хамаарыштыр үнелелди берген. Таныжылга турнуң түңнелдери-биле “Сибирь дыштанылглары” маршрутка турисчи путевкалар садарынга кады ажылдаарының дугайында дугуржулгага аттарны салыры чадапчок.
“Сибирь дыштанылгалары” маршруттуң объектилери-биле таныжар дээш "Веди групп" КХН (Москва), "Алеан-Турне" КХН (Москва), "ПАКТУР" агентилел АН (Москва), "Ампарус Тур" КХН (Санкт-Петербург), "ИНТУРИСТ" туроператор" КХН (Москва), "Магазин путешествий" туроператор" КХН, "Звезды путешествий" КХН (Санкт-Петербург), "Вокруг света" турисчи фирма” КХН (Москва), "Европорт" КХН (Свердловск область, Екатеринбург) турисчи операторларның эксперттери келген.
Туроператорларның төлээлери «Сибирь дыштанылгалары» маршрутта объектилерни: “Азия төвү” скульптурлуг комплексти, Алдан-Маадыр аттыг Национал музейни, Тыва чаңчылчаан культура төвүн, «Будданың изи» ыдыктыг черни, Дүрген каньонун, «Алдын-Булак» этнокультурлуг комплексти база «Тос-Булак» малчын турлагны эргээн.
Туроператорлар-биле информастыг тур – Сибирьниң мурнуу чүгүнче национал маршрутту нептередир талазы-биле Ростуризмниң бир хемчээ болур. Бо чылдың июньда, Петербургтуң 25-ки делегейниң экономиктиг шуулганының үезинде, маршрутту таныштырганын сагындыраал. А июль эгезинде чаа национал маршрут-биле бирги туристер аъттаныпкан. Ростуризмниң удуртукчузу Зарина Догузова Красноярск край, Хакасия база Тываже чаа турисчи угланыышкынның аян-чорукчуларны хүлээп алырынга баш бурунгаар беленин хынаан соонда, федералдыг деңнелдиг чаңгыс турисчи угланыышкын - Сибирьниң мурнуу чүгүн хөгжүдер дугайында дугуржулгага адаттынган регионнарның удуртукчулары-биле атты салган.

Тываның Чазааның парлалга албаны.