Тыва Республикада «Россияда ажыл» кадрлар төвү-биле «Ада-чурт камгалакчылары» фондунуң регионалдыг салбыры тускай шериг операциязының киржикчилеринге болгаш оларның өг-бүлелеринге хостуг ажылчын олуттар ярмарказын организастап эрттирер. Ол Кызыл хоорайда Аныяктар өргээзинге октябрь 15-те болур.
Социал камгалал, күш-ажыл болгаш чонну ажылга хаара тудар регионалдыг органнарның боттандырып турары деткимче хемчээниң бирээзинге тускай шериг операциязының киржикчилерин болгаш оларның өг-бүле кежигүннерин күш-ажылга хаара тудары болур. Республиканың Баштыңы Владислав Ховалыг ТШО-дан халашкан киржикчилерниң, ооң санында кадыкшыл байдалы кызыгаарлыг дайынчыларның амыдыралга дүрген чаңчыгар байдалдарын тургузар ол угланыышкынны күштелдирерин дааскан.
«Лунсин», «Тываның даг-руда компаниязы», «Эльбрусметалл-литий», «Туваавтотранс», «Автоколонна 17» КХН-нер база УПП ВОС дээш, өске-даа улуг компаниялар тускай шериг операциязының киржикчилеринге болгаш оларның өг-бүле кежигүннеринге хостуг ажылчын олуттарны ярмаркада сүмелээр.
«Ада-чурт камгалакчылары» фондунуң ажыл-чорудулгазының мурнады боттандырар угланыышкыннарының бирээзинге ТШО хоочуннарын болгаш оларның өг-бүле кежигүннерин ажылга тургузары хамааржыр.
«Фондунуң бүгү-ле салбырларында ышкаш, ол угланыышкын-биле ажылга тургузар болгаш өөредир тускай сорулгалыг ажылдаар секторну бо чылдың январьда тургускан бис. Фондунуң ажылдап эгелээн үезинден бээр ажылга тургустунарынче дуза дилээн 300 ажыг билдириишкин бистиң салбырывысче кирген. Оларның 82 хуузу эки шиитпирлеттинген. Ам октябрь 15-те, ТШО киржикчилеринге ийи дугаар тускай ярмарка эртер. Бо удаада эмчилер шинчилгези эртер, анализтер дужаар, психологтуң консультациязын алыр диспансеризацияны программаже киирген бис» - деп, салбырының удуртукчузу Мерген Кызыл-оол дыңнаткан.
«Россияда ажыл» кадрлар төвүнүң директору Айлана Бюрбю бо чыл эгезинден бээр чонну ажылга хаара тудар төптерже 151 ТШО киржикчизи ажылга тургузар дилегни кииргенин дыңнаткан.
«Россияда ажыл» порталда ажылга тургустунарынга деткимче хемчеглери көрдүнген болгаш, киржикчи бүрүзүнге аңгы хемчеглер планы тургустунган. Бо хүнде 11 ТШО киржикчизи «автомобиль кранының машинизи», «автобус чолаачызы», «С категорияның чолаачызы», «эки турачы өртчүлер дружиналарын белеткээри» мергежилдерге эде белеткел курстарын эрткен. Сес кижи өөредилгезин уламчылавышаан. Ийи кижи өөренип дооскаш, ажылда тургустунган, бир кижи Тываның күрүне университединиң хүндүскү салбырынче дужаап кирген. 27 кижи социал керээ чаргаш, бодунуң ажыл-херээн ажыткан.
«Тускай шериг операциязының киржикчилери чонну ажылга хаара тудар төптер таварыштыр чаа мергежилдерге өөренип, ажыл берикчилеринден чөптүг саналдарны алыр дээрзинге идегеп турар бис. Ынчангаш ТШО киржикчилериниң өг-бүле кежигүннерин база ярмаркаже чалап тур бис. Ажыл тып алырынга оларга база дузаны көргүзер. Бо чылдың эгезинден бээр ТШО киржикчилериниң 57 өг-бүле кежигүннери «Россияда ажыл» кадрлар төвүнче чагыгны киирген, оларның 31-инге ажылче тургустунарынга дузалашкан бис» — деп, Айлана Бюрбю дыңнаткан.
Регионнуң күш-ажыл рыногунда электромонтаж, кран болгаш экскаватор башкарар, ыяш болбаазырадыр адырларда, эмчи ажылдакчылары, күш-ажыл башкылары, программистер болгаш өске-даа специалистер онза негеттинип турарын Тываның «Россияда ажыл» кадрлар төвү дыңнаткан.
ТШО киржикчилерин ажылга хаара тударынга «Тываның маадырлары» регионалдыг төлевилел база идигни берип турар. Төлевилелдиң финалистери Тываның күрүне университединиң баазазында РАНХиГС-тиң программалары-биле өөренип турарлар. Программаның тиилекчилериниң бирээзи Иван Монгуш эрткен неделяда Тываның Лицензия албанында удуртукчунуң оралакчызы кылдыр ажылдап эгелээн.
