«Тываның маадырлары» регионалдыг төлевилелдиң төнчү чадазының киржикчилери Тываның күрүне университединде сентябрь 11-де эгелээн профессионал эде белеткел өөредилге программазының бирги кезээн дооскан. Хөй талалыг программа өөредилге, спортчу, культурлуг болгаш гуманитарлыг угланыышкыннарга киржикчилерни белеткээринге комплекстиг арганы тургузарынче угланган.
Программаның дыңнакчылары эде белеткел үезинде күрүне болгаш муниципалдыг удуртулганың үндезиннерин шиңгээткен. Регионалдыг Чазактың, күүсекчи эрге-чагырга органнарының, тус чер бот-башкарылгазының төлээлери база ТывКУ-дан арга-дуржулгалыг башкылар болгаш Президент академиязының Күрүне эргелеп-башкарылгазының дээди школазының эксперттери кичээлдерни эрттирген.
«Хууда болгаш профессионал сайзыралче онза кичээнгейни угландырган. Төлевилелдиң киржикчилери-биле оларның кадыын болгаш психологтуг шыдамык чоруун хайгаараан хууда интервьюларны, ол ышкаш «дайынчы үженниң» командалыг кады ажылдажылгазын сайзырадыр программаны эрткен» — деп, ТывКУ-нуң ректору Ольга Хомушку демдеглээн.
Тываның ат-сураглыг спортчулары-биле эртенги сула шимчээшкиннер спортчу кичээл – программаның чарылбас кезээ. Хоочуннар эртенги шимчээшкин соонда мини-футболду ойнааннар. Бо арга чүгле мага-боттуң эвес, а бөлүктүң иштинде сагыш-сеткил дыштанылгазын бээр.
Төрээн чуртка ынакшылды хевирлээринче база өг-бүлениң үнелиг чүүлдерин быжыглаарынче угланган хемчеглерде культурлуг болгаш гуманитарлыг угланыышкыннар кирген. Киржикчилер «Төөгү болгаш сактыышкын» деп шериг-патриотчу шуулганга киржип, Алдан-Маадыр аттыг национал музейни сонуургап, Национал театрның артистери-биле чогаадыкчы ужуражылгаларны эрттирип, симфониктиг оркестрниң концерттерин көргеннер. Дайынчыларның өг-бүлелери-биле ол хемчеглерге киришкен.
Дыңнакчылар өөредилгениң бирги чадазын дооскаш, Президент академиязының порталынга тестилерни эрткеш, шылгалдаларда эки түңнелдерни көргүскен. Бөлүктүң өөредилгеде чедиишкиннери 82 хуу болган.
«Күрүне эргелеп-башкарылгазының дээди школазындан эксперттер байырлыг ажыдыышкындан эгелээш, кичээлдер эрттирерин, команданы тургузарын, спортчу, культурлуг-өөредиглиг хемчеглерни организастаарынга чедир, өөредилгениң бирги чадазы бедик деңнелге эрткенин демдеглээннер» — деп, Тываның күрүне университеди дыңнаткан.
Төлевилелдиң киржикчилери боттарының дагдыныкчыларының удуртулгазы-биле стажировкалар аразында база үш өөредилге модульдарын эртер ужурлуг. Тываның Баштыңы Владислав Ховалыгның эгелээни «Тываның маадырлары» регионалдыг кадрлар программазын «Маадырларның үези» деп Президентиниң программазынга дөмейлештир ажылдап кылдынганын сагындыраал. Тайбың амыдыралче чанып келген соонда, тускай шериг операциязының киржикчилерин деткип, оларның социализациязын болгаш ажылга хаара тударын деткиир угланыышкын-биле ону кылган.
ТР-ниң Чазааның парлалга албаны