Президентиниң грантылар фондузундан деткимче бээр мөөрейлер чылда ийи катап эртип турар. Бо чылын ийи конкурсче кирген 52 чагыг аразындан Тывада коммерцияга хамаарышпас организацияларның беш төлевилели түңнелди эрткен. Фондудан оларны боттандырарынга үш млн хире рубльди аңгылаан. Оларны июль 1-ден акшаландырып эгелээр.
Бо чылын 9,8 млрд рубльди Президентиниң грантылар фондузунуң шугуму-биле күрүнениң эвес коммерцияга хамаарышпас организацияларны деткииринче угландырган.
Тывадан коммерцияга хамаарышпас ийи организация бирги мөөрейниң түңнели-биле грант деткимчезин алыр. Кызыл хоорайның хөй-ниити организациязы «Хатико» дириг амытаннар камгалаар ниитилел” база «Тыва Республиканың чурттакчы чонунга социал дуза көргүзер идепкейжи кижилер эвилели» регионнуң хөй-ниити организациязының «60+ время для нас» төлевилели кирген.
Ийиги мөөрейниң түңнелинде «Арага болгаш наркотиктерден хамаарылгалыг апарган кижилерни деткиир «Дамырак» төвү автономнуг коммерцияга хамарышпас организацияның «Бодумче орук» төлевилели, аныяктар инициативаларын деткиир «Каптагай» деп Тываның регионнуң хөй-ниити организациязының «Этноглина» пор кылыглар уран чүүлүнүң школа-студиязы» төлевилели база «АС-Профи» немелде өөредилге хуу албан чериниң «Келир үениң авазының хүн демдеглели» деп төлевилели шилилдени эрткен.
Президентиниң грантылар фондузунуң дараазында мөөрейинче чагыгларны 2022 чылдың сентябрь 1-ден октябрь 17-ге чедир хүлээр.
Тываның Чазааның парлалга албаны.