Тываның чурттакчыларының чыгганы гуманитарлыг ачы-дузаның ээлчеглиг чүъгү февраль 27-де, ай санаашкыны-биле чаа чыл болур Шагаа байырлалының бүдүүзүнде, Курск облазынга болгаш Донецк Улус Республикага чеде берген. Адрестиг посылкаларны, техниктиг дериг-херекселдерни, авто болгаш мото транспортту, аъш-чем аймаан, ооң иштинде эътти шериг кезектеринге улаштыр үлеп бээр кылдыр Командирлер чөвүлелинге дамчыткан. Республиканың Камбы-лама эргелелиниң төлээлери шериг албанныгларга мөргүл ёзулалын эрттирип, камгалалдарны үлээн.
агаа байырлалы уткуштур ТШО киржикчилерин деткээн гуманитарлыг ачы-дузаны чыыры болгаш чедирери Тывада чаңчыл болу берген. Регионнуң Баштыңы Владислав Ховалыгның даалгазы езугаар, бо чылын гуманитарлыг ачы-дуза чыыр даалганы Улусчу фронтунуң регионалдыг күүсекчи комитединиң кежигүннери, Тыва культура төвүнүң төлээлери болгаш сарыг шажын лама башкылары #ВседляПобеды деп Бүгү-российжи акция боттандырылгазы-биле чоруткан. Январь төнчүзүнде волонтерлар бөлүү ачы-буян акциязынга каттыжар кыйгырыг-биле республиканың шупту кожууннарынче үнүүшкүннерни чоруткан.
Ооң түңнелинде Донецк Улус Республика биле Курск облазынче “УАЗ” маркалыг ийи машинаны, «Нива» автомашинаны база 17 мотоциклди чедирип хүлээткен. Эът аймаа болгаш дериг-херекселдерден аңгыда, 30 генераторну, 100 ажыг чаштынар четкилерни, дөрт квадрокоптерни, хууда арыг-силиг херекселдерин, аъш-чем аймаан, техниктиг дериг-херекселдерни болгаш чылыг идик-хептерни чедирген. Чүъктүң ниити деңзизи 35 тонна чеде берген.
Чүъктүг автоколонна Донецк Улус Республикада Чаңгыс аай харылзаа төвүнге доктаап, аңаа чүъктү дүжүрүп, үлээн. А Командирлер чөвүлели ниити чүъктү үлештирген болза, дайынчылар бодунуң адында келген посылкаларын алган.
Улусчу фронтунуң регионалдыг күүсекчи комитединиң даргазы Саима Далчинниң демдеглээни болза, бо ажыл чүгле гуманитарлыг эвес, а сүзүк-чүдүлге-биле база холбашкан. Шагаа бүдүүзүнде буддийжи лама башкылар дайынчылар дээш мөргүлдерни номчуп, оларның хей-аъдын көдүреринге улуг рольду ойнаан деп, С. Далчин чугаалаан.
Ламалар мөргүл болгаш шажынчы арыглаашкын ёзулалдарын эрттирген – артыш-биле айдызап, Цеченлинг хүрээзиниң лама башкыларының ыдыктааны камгалалдарны дайынчыларга үлээн. Ырак черде чоруур дайынчылар төрээн чери болгаш ужур-чаңчылдары-биле харылзааны туткан ышкаш болганнар.
Курск облазының кызыгаар чоогунда чурттакчылыг черлериниң бирээзинге чүъктү дүжүрүп, шыгжаан. ТР-ниң Дээди Хуралының (парламентизиниң) депутады Эрес Хуурак ол угже чүък сөөртүлгезин харыылаан. Гуманитарлыг ачы-дузадан аңгыда, ТР-ниң Дээди Хуралының (парламентизиниң) Даргазы Каң-оол Давааның дайынчы хүлээлгезин эрес-дидим, ак сеткилдиг күүсеткен дайынчыларга тураскаалдыг медальдарны тыпсыр даалгазын күүсеткен. Ол чорааш, тываларның албан-хүлээлге эрттирип турар аңгы-аңгы кезектеринге чедип, Ада-чурттуң Улуг дайынының тулчуушкуннарынга киришкен тыва аъттыг шериг эскадронунуң тугунуң хоолгаларын база белекке берген.
Боттарының дилээ-биле посылкаларын алган шериг албанныглар оларже техниктиг дериг-херекселдерни, мотоциклдерни, аъш-чемни, эм-таңны болгаш оон-даа хөйнү чорудуп берген чаңгыс чер чурттугларынга болгаш ачы-дуза чыылдазының организакчыларынга өөрүп четтиргенин илереткеннер.
А. МОНГУШ.
Чуруктарны интернет четкизинден алган.
«Шын» №9 2025 чылдың март 13
